پیپلزپارٹی رہنما عبدالقادر پٹیل کے بابر اعظم سے متعلق بیان پر سابق کرکٹر باسط علی کا ردعمل آگیا۔
اے آر وائی نیوز کے پروگرام ’ہر لمحہ پرجوش‘ میں گفتگو کرتے ہوئے سابق ٹیسٹ کرکٹر باسط علی نے کہا کہ قادر پٹیل کو اسمبلی فلور پر ایسا نہیں بولنا چاہیے تھا، کرکٹر کا کام کرکٹ کھیلنا ہے وہ اپنی سیاست کریں۔
باسط علی نے کہا کہ قادر پٹیل کا ایسا بولنا اظہار رائے نہیں طنز ہے، بابر اعظم ہو، رضوان ہو، چاہے وہاب ریاض ہو، طنز کی آزادی نہیں ہے، کرکٹرز ہماری فیملی سے ہیں، ہم ان کے پیچھے کھڑے ہیں۔
سابق کرکٹر نے کہا کہ کیا ہم سیاست دانوں پر طنز کریں؟ اچھا نہیں لگتا یہ ہمارا کام نہیں ہے۔
اس سے قبل پیپلز پارٹی رہنما عبدالقادر پٹیل نے قومی اسمبلی کے اجلاس میں اظہار خیال کرتے ہوئے قومی ٹیم کے کپتان بابر اعظم کو مشورہ دیا تھا۔
ان کا کہنا تھا کہ میری بات کو سنجیدہ نہ لیا جائے مذاق کر رہا ہوں، بابر اعظم کو مشورہ ہے وہ اپنے خلاف سازش ہونے کا دعویٰ کر دے، وہ ایک خط لہرائے اور پھر کہہ دے خط گم ہوگیا ہے جان چھوٹ جائے گی۔
