نئی دہلی: پاکستان کرکٹ ٹیم کو ورلڈ کپ 2019 سے باہر کروانے کا مطالبہ کرنے والے بھارتی کرکٹ بورڈ کی عقل ٹھکانے آگئی۔
تفصیلات کے مطابق پاکستان کرکٹ ٹیم کو ورلڈ کپ 2019 سے باہر کروانے کا مطالبہ کرنے والے بی سی سی آئی کو اعتراف کرنا پڑا کہ وہ پاکستان کو ورلڈ کپ میں شرکت سے نہیں روک سکتا ہے آئینی طور پر ایسا نہیں کیا جاسکتا ہے۔
بی سی سی آئی کے ترجمان کا کہنا ہے کہ آئی سی سی کا قانون تمام ممبر بورڈز کو آئینی تحفظ فراہم کرتا ہے، کوالیفائنگ ٹیموں کو آئی سی سی ایونٹس سے نہیں روکا جاسکتا ہے۔
واضح رہے کہ بھارتی کرکٹ بورڈ نے ورلڈ کپ 2019 سے پاکستان کو باہر کرنے کے لیے آئی سی سی کو خط لکھا اور پھر خود ہی مان لیا کہ ایسا ممکن نہیں ہے۔
دوسری جانب سابق کپتان سارو گنگولی نے پاکستان کیخلاف ہرزہ سرائی کرتے ہوئے دعویٰ کیا بھارت نہیں ہوگا توورلڈ کپ بھی نہیں ہوسکتا۔
مزید پڑھیں: بھارت کا آئی سی سی سے پاکستان کو ورلڈ کپ سے باہر کرنے کا مطالبہ
یاد رہے نٹرنیشنل کرکٹ کونسل(آئی سی سی) ورلڈ کپ 2019 کے شیڈول کا باضابطہ اعلان کرچکی ہے، جس کے تحت یہ ٹورنامنٹ مئی 30 سے جولائی 14 کے درمیان انگلینڈ اور ویلز میں کھیلا جائے گا۔
میزبان انگلینڈ اور جنوبی افریقہ ٹورنامنٹ کا پہلے میچ اوول کے میدان پر 30 مئی کو کھیلا جائے گا جبکہ پاکستان کا پہلا میچ ویسٹ انڈیز کے خلاف ہے جو 31 مئی کو ٹرینٹ برج پر کھیلا جائے گا.
واضح رہے کہ پلوامہ خودکش حملے میں 44 بھارتی فوجی مارے گئے تھے جس کے بعد بھارت نے پاکستان کے خلاف محاذ کھول دیا، تجارتی پابندی کے ساتھ ساتھ پاکستانی اداکاروں پر بھی بھارتی فلموں میں کام کرنے پر پابندی عائد کردی ہے۔
