پولینڈ سے کھدائی کے دوران قبل مسیح دور کا سات ہزار سال پرانا انسانی ڈھانچہ درست حالت میں دریافت کیا گیا ہے۔
غیر ملکی میڈیا کے مطابق پولینڈ کے ماہرین آثار قدیمہ نے کھدائی کے دوران قبل مسیح دور کا 7 ہزار سال پرانا انسانی ڈھانچہ بالکل درست حالت میں دریافت کیا ہے۔
رپورٹ کے مطابق یہ قدیمی انسانی ڈھانچہ ٹاؤں اسکوائر کی تزئین و آرائش کے لیے کی جانے والی کھدائی کے دوران دریافت کیا گیا ہے۔
اس حوالے سے آثار قدیمہ کی ٹیم کے رکن پاؤل مائیک کا کہنا ہے کہ انسانی ڈھانچے کے ساتھ مٹی کے برتن اور چقماق کے ٹکڑے بھی دریافت ہوئے ہیں۔ ان برتنوں کا تعلق آج سے تقریباً سات ہزار سال قبل استعمال ہونے والے خاص ثقافتی برتنوں سے ہے جس کی وجہ سے یہ ڈھانچہ بھی اتنا ہی قدیم ہوسکتا ہے۔
انہوں نے بتایا ڈھانچے کے ہزاروں سال تک محفوظ رہنے کی ایک ممکنہ وجہ بتاتے ہوئے کہا کہ اس ڈھانچے کو مٹی بھرے ہوئے ایک پیکٹ میں محفوظ کر کے دفن کیا گیا تھا اور اس مٹی کی خاص بات یہ تھی کہ اس میں کسی قسم کے کیمائی اجزا موجود نہیں تھے۔
پاؤل مائیک ڈھانچے کی شناخت کے حوالے سے کہا کہ فی الحال ہم اس ڈھانچے کی شخصیت جاننے سے قاصر ہیں کہ یہ کون تھا؟ تاہم یہ ایک اہم اور دلچسپ دریافت ہے اس کی شناخت کے حوالے سے مزید معلومات ایک ماہر بشریات کی رپورٹ سامنے آنے کے بعد معلوم ہوگی۔
