بھارتی کرکٹ بورڈ (بی سی سی آئی) نے انگلینڈ کے معروف کرکٹر پر آئی پی ایل کھیلنے پر دو سال کی پابندی عائد کر دی ہے۔
بھارتی میڈیا کے مطابق انڈین پریمیئر لیگ (آئی پی ایل) کا 18 واں سیزن رواں ماہ 22 مارچ سے شروع ہو رہا ہے تاہم انگلینڈ کے معروف کرکٹر ہیری بروک یہ لیگ نہیں کھیل سکیں گے کیونکہ بی سی سی آئی نے ان پر دو سال کے لیے آئی پی ایل کھیلنے پر پابندی عائد کر دی ہے۔
رپورٹ کے مطابق بی سی سی آئی نے یہ قدم ہیری بروک کے ٹورنامنٹ شروع ہونے سے قبل آخری لمحات میں لیگ سے دستبردار ہونے کی وجہ سے اٹھایا ہے۔
بی سی سی آئی کی جانب سے ہیری بروک اور انگلینڈ اینڈ ویلز کرکٹ بورڈ کو بیٹر پر 2 سالہ پابندی عائد کرنے کے اپنے فیصلے سے آگاہ کر دیا گیا ہے۔
آئی پی ایل کے نئے قانون کے مطابق نیلامی میں رجسٹر کوئی بھی غیر ملکی کھلاڑی فرنچائز کی جانب سے خریدے جانے کے بعد سیزن کے آغاز سے پہلے ٹورنامنٹ سے دستبردار ہوجائے تو اس پر ٹورنامنٹ میں شرکت پر 2 سیزن کے لیے پابندی عائد کی جائے گی۔
واضح رہے کہ ہیری بروک کو آئی پی ایل 2025 کیلیے دہلی کیپیٹلز نے خریدا تھا لیکن انہوں نے ٹورنامنٹ شروع ہونے سے قبل اس سے دستبرداری کا اعلان کیا تھا۔ انہوں نے گزشتہ سیزن میں بھی دہلی کی ٹیم سے اپنا معاہدہ منسوخ کر دیا تھا۔
ہیری بروک نے اس حوالے سے سوشل میڈیا پر ایک بیان جاری کرتے ہوئے آئی پی ایل کے 18 ویں سیزن میں شرکت نہ کرنے کا اعلان کرتے ہوئے دہلی کیپٹلز سے معذرت کا بھی اظہار کیا تھا۔
چیمپئنز ٹرافی جیتنے پر ویرات کوہلی نے اپنے ڈرائیور کو 50 لاکھ انعام دیا، حقیقت کیا؟
