موسم سرما میں اکثر خواتین کے بالوں کی صحت اور نشونما متاثر ہوتی ہے، جس کے سبب بال روکھے اور بے جان سے ہوجاتے ہیں، اس کے علاج کیلئے اچھے اور معیاری شیمپو کے ساتھ بہترین ہیئر کنڈیشنر کا استعمال بھی ضروری ہے۔
یہاں یہ بات بھی قابل ذکر ہے کہ بالوں کو نرم و ملائم بنانے کے لیے بغیر کیمیکل والے کنڈیشنر کا استعمال کرنا چاہئے تاکہ بالوں پر ان کا اثر اچھا اور کارآمد نظر آئے۔
اے آر وائی ڈیجیٹل کے پروگرام گڈ مارننگ پاکستان میں معروف ہربلسٹ ڈاکٹر بتول نے گھر میں ہیئر کنڈیشنر بنانے کا نہایت آسان طریقہ بتایا جو کسی بھی کیمیکل سے پاک ہے۔
انہوں نے بتایا کہ اگر آپ اپنے بالوں کو کیمیکلز سے بچانا چاہتے ہیں تو گھر پر موجود اجزاء کی مدد سے باآسانی اپنے بالوں کی مناسبت سے کنڈیشنر تیار کرسکتی ہیں جو بہت آسان اور آزمودہ ہے۔
ڈاکٹر بتول نے بتایا کہ کسی بھی اچھے برانڈ کا کنڈیشنر تھوڑی سی مقدار میں لیں اس کے بعد اگر آم کا موسم ہو تو ٹھیک ورنہ کیلے کا گودا بھی تھوڑا سا شامل کرلیں۔ اس کے علاوہ ا س میں کوکونٹ کریم ایک چمچ کے ساتھ زنک اور السی کا تیل ایک چمچ بھی ملا لیں۔
اب سب اشیاء کو اچھی طرح مکس کرکے بالوں میں لگائیں کیمیکل سے پاک کنڈیشنر تیار ہے آپ اسے ہفتے میں دوبار لگائیں۔ لیکن یاد رہے کہ یہ پیسٹ بالوں کی جڑوں میں بالکل نہیں لگانا، جڑوں کو بچا کر بورے بالوں کی لمبائی میں آدھا گھنٹے بعد انہیں دھولیں آپ کے بال خوبصورت لچک دار اور چمکدار ہوجائینگے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔
