مختلف اشیاء سے تیار کیے جانے والے تیل کا استعمال نہ صرف متعدد بیماریوں سے محفوظ رکھتا ہے بلکہ بڑھتی عمر کے اثرات کو زائل کرنے کیلیے بھی آزمودہ ہے۔
ویسے تو روغنیات کو بعض اوقات مضر صحت قرار دیا جاتا ہے جبکہ کچھ پھلوں اور سبزیوں سے حاصل کیے جانے والے تیل صحت اور خوبصورتی دونوں کے لیے بے حد مفید بھی ہوتے ہیں۔
اس حوالے سے اے آر وائی ڈیجٹل کے پروگرام گڈ مارننگ پاکستان میں معروف ہربلسٹ ڈاکٹر عیسیٰ نے پھلوں سبزیوں اور میوہ جات کے تیلوں کو ملا کر ایسا مجرب نسخہ ’ایج ریورس آئل‘ بتایا جو صحت مند ہونے کے ساتھ خواتین کی خوبصورتی کا بھی محافظ ہے۔
ڈاکٹر عیسیٰ نے دعویٰ کیا کہ یہ وہ نسخہ ہے جو برطانوی شہزادی لیڈی ڈیانا اپنی خوبصورتی کو برقرار رکھنے کیلئے استعمال کیا کرتی تھیں۔
اس ’ایج ریورس آئل‘بنانے کی ترکیب بتاتے ہوئے ان کا کہنا تھا کہ یہ چیز 20 یا 25 سال کی لڑکیوں کیلئے نہیں بلکہ 40 سال سے زائد عمر کی خواتین کیلئے ہے جن کے چہرے کی جلد ڈھیلی پڑ جاتی ہے یا گردن وغیرہ پر لکیریں آجاتی ہیں۔
انہوں نے کہا کہ سب سے پہلے بادام کا تیل 60 ملی لیٹر لیں اس میں صندل کی لکڑی کا تیل (صندل ووڈ آئل) کے دس قطرے، پریمیم روز آئل (گلاب کے پھول کا تیل ) کے دس قطرے، لیمن آئل کے تین قطرے، لیوینڈر آئل کے دس قطرے، نیرولی آئل دس قطرے، کیرٹ سیڈ آئل (گاجر کا تیل) دس قطرے، روز میری آئل کے صرف دو قطرے شامل کرکے مکس کرلیں۔
ڈاکٹر عیسیٰ نے تیل کے استعمال کے بارے میں بتایا کہ رات کو سونے سے قبل منہ دھو نے کے بعد اس کو ہلکا سا چہرے پر لگا کر مساج کریں اور سو جائیں، ان کا کہنا تھا کہ اس کے ساتھ ساتھ آپ نے اچھی خوراک کا بھی خیال رکھنا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔
