شوبز انڈسٹری کی معروف اداکارہ بینا چوہدری نے انکشاف کیا ہے کہ کسی نے مجھ پر کالا جادو کروایا تھا میں مرنے والی تھی اللہ خدا نے نہیں زندگی دی۔
بینا چوہدری حال ہی میں نجی ٹی وی کے مارننگ شو میں شرکت کی جہاں انہوں نے اداکاری سمیت دیگر معاملات پر کھل کر باتیں کی اور بتایا کہ کچھ عرصہ قبل وہ شدید علیل ہوگئی تھیں۔
ان کے مطابق لوگ جادو کو مذاق سمجھتے ہیں لیکن جس پر ہوتا ہے انہیں علم ہوتا ہے کہ وہ کتنا مشکل ہوتا ہے، بظاہر انسان خوش ہوتا ہے لیکن اندر ہی اندر وہ بیمار رہتا ہے۔
بینا چوہدری کا کہنا تھا کہ جنہوں نے ان پر کالا جادو کیا انہوں نے سوچا ہوگا کہ ان کا ویسے تو کچھ بگاڑ نہیں سکتے، اس لیے ان پر جادو کردیتے ہیں۔
سینیئر اداکارہ کے مطابق کالے جادو کے باعث وہ شدید بیمار رہتی تھیں، انہوں نے خود کو کمرے تک محدود کردیا، ان کا کھانے پینے سے دل اٹھ گیا تھا اور انہیں لگتا تھا کہ بس اب وہ جانے والی ہیں۔
بینا چوہدری نے بتایا کہ کالے جادو کے باعث ہی ایک رات وہ مرنے والی تھیں، انہیں اس رات شدید تکلیف ہوئی اور سانس لینے میں مشکل ہو رہی تھی، جس کے بعد انہوں نے اپنی موت کو قریب دیکھ کر کلمہ پڑھا۔
اداکارہ کا کہنا تھا کہ کلمہ پڑھتے ہی ان کے لیے آسانیاں ہوگئیں، وہ بہتر انداز میں سانس لینا شروع ہوئیں اور انہیں نئی زندگی ملی، تب وہ اٹھیں اور کافی دیر تک سوچتی رہیں کہ ان کے ساتھ کیا ہوا؟
بینا چوہدری نے کہا کہ کالے جادو کا اثر ہونے کے وقت انہوں نے خوب عبادت کی، انہیں روحانی سکون ملا اور انہوں نے اتنی عبادت کی کہ انہیں لاشعوری طور پر بھی چیزوں کی سمجھ آنے لگی۔
ان کے مطابق انہوں نے کالے جادو کے سائے تلے زندگی کے پانچ سال گزارے اور اسی دوران ہی ان کی زندگی میں ایک رہنما شخص آئے، جنہوں نے انہیں فون پر ہدایات دیں اور رہنمائی کی اور آج تک وہ ان سے ذاتی طور پر نہیں ملیں اور اب وہ بلکل ٹھیک ہیں۔
بینا چوہدری کو شوبز میں کام کرتے ہوئے دو دہائیوں سے زیادہ وقت گزر چکا ہے، وہ تین درجن سے زائد ڈراموں میں اداکاری کر چکی ہیں۔
