کراچی: وزارت آئی ٹی نے بیپ پاکستان کے نام سے خصوصی اور محفوظ ایپلی کیشن تیار کر لی۔
تفصیلات کے مطابق وزارت انفارمیشن ٹیکنالوجی کا ایک اور کارنامہ سامنے آ گیا، Beep کنیکٹنگ پاکستان کے نام سے ایک محفوظ ایپلیکیشن تیار کر لی گئی۔
وفاقی وزیر آئی ٹی امین الحق کا کہنا ہے کہ تمام سرکاری افسران اور ملازمین اس ایپلیکیشن کے استعمال کے پابند ہوں گے، ایپلیکیشن پر اِن ہاؤس آزمائش ہو رہی ہے، چند ماہ آزمائش کے بعد اسے لانچ کر دیا جائے گا۔
وفاقی وزیر آئی ٹی کے مطابق ابتدائی طور پر اس ایپلی کیشن میں چیٹ اور آڈیو کال کی سہولت ہوگی، کچھ ماہ بعد اس میں وڈیو کال کا فیچر بھی آن کر دیا جائے گا۔
امین الحق کا کہنا ہے کہ اس ایپلیکیشن کو انتہائی محفوظ بنانے کی مکمل کوشش کی گئی ہے، کوشش ہے کہ سرکاری افسران و ملازمین کی اہم گفتگو لیک نہ ہو سکے۔
