سابق بھارتی کرکٹر گوتم گمبھیر نے انکشاف کیا ہے کہ انھیں کولکتہ میں میچ کے دوران بنگال کے دوسری بار تقسیم ہونے کا خدشہ تھا۔
گوتم گمبھیر جو کہ کولکتہ نائٹ رائیڈرز کے ہیڈ کوچ ہیں اور ان کی سربراہی میں ٹیم نے باآسانی آئی پی ایل کے فائنل میں جگہ بنائی ہے۔ انھوں نے ماضی کا ایک دلچسپ قصہ سنایا ہے جب انھیں لگ رہا تھا کہ تقسیم ہند کے بعد دوسری بار بنگال کی سرزمین پھر سے تقسیم ہونے جارہی ہے۔
روی چندرن ایشون کے یوٹیوب چینل پر گفتگو کرتے ہوئے انھوں نے بتایا کہ 2011 کے آئی پی ایل سیزن کے دوران ہونے والے میچ کے بارے میں بتایا کہ انھیں گراؤنڈ میں کس طرح کی سپورٹ ملی تھی۔
انھوں نے بتایا کہ مجھے کئی لوگوں نے کہا تھا کہ تم نے گنگولی کی جگہ کے کے آر کے قائد کا عہدہ سنبھالا ہے اور دادا کو کولکتہ میں بہت زیادہ پسند کیا جاتا ہے اس لیے شائقین کے برتاؤ کے لیے تیار رہنا۔
سابق کرکٹر نے بتایا کہ میں کولکتہ کے لیے جذبات رکھتا ہوں کیونکہ مجھے وہ ایڈن گارڈن میں ایک میچ یاد ہے۔ ہم پونے واریئرز کے خلاف کھیل رہے تھے اور میرے خیال میں پورا اسٹیڈیم جامنی اور نیلے رنگ میں تقسیم ہوگیا تھا.
ساروو پونے واریئرز کی قیادت کر رہے تھے جبکہ میں کولکتہ کی سربراہی کررہا تھا ایسے میں مجھے لگا کہ تقسیم ہند کے بعد بنگال دوسری بار تقسیم ہو گا۔
خیال رہے کہ گوتم گمبھیر کی بطور ہیڈ کوچ تقرری کے بعد کولکتہ کی ٹیم کئی سال بعد آئی پی ایل کے فائنل میں پہنچی ہے جبکہ انھیں بھارتی ٹیم کا ہیڈ کوچ بنائے جانے کے حوالے سے بھی خبری گردش کررہی ہیں۔
