واشنگٹن: امریکی گلوکارہ بیونسے نے طوفانی بارش میں شائقین کی محفوظ گھر واپسی کے لیے ایک گھنٹے کی ٹرین سروس خرید لی، جس کے لیے انھوں نے انتظامیہ کو ایک لاکھ ڈالر ادا کیے۔
غیر ملکی میڈیا رپورٹس کے مطابق امریکی گلوکارہ اور سانگ رائٹر بیونسے نے کانسرٹ میں آنے والے فینز کو پریشانی سے بچانے کے لیے ایک بے مثال قدم اٹھایا، بیونسے نے طوفانی بارش میں ٹرین سروس مزید ایک گھنٹہ چلانے کے لیے واشنگٹن انتظامیہ کو ایک لاکھ ڈالر ادا کر دیے۔
خراب موسم کی وجہ سے میٹرو سروس نے آخری ٹرین کو ایک گھنٹہ قبل بند کرنے کا اعلان کیا تھا، لیکن بیونسے نے اپنے مداحوں کے لیے واشنگٹن میٹروپولیٹن کو ٹرینیں اضافی گھنٹے چلانے کے لیے ایک لاکھ ڈالر کی رقم فراہم کرنے کا اعلان کیا، جس کے بعد تمام 98 اسٹیشنز کو شائقین کے باہر نکلنے تک کھلا رکھا گیا۔
رپورٹس کے مطابق 6 اگست کو واشنگٹن ڈی سی کے ’فیڈ ایکس فیلڈ‘ میں بیونسے کا کنسرٹ تھا، جو خراب موسم کے باعث پہلے ہی تاخیر کا شکار تھا، تاہم کنسرٹ کے دوران بھی موسلادھار بارش اور آسمانی بجلی گرنے کے باعث شائقین اندر پھنس گئے تھے، جن کے لیے ٹرین سروس رات کو مزید ایک گھنٹے کے لیے چلائی گئی۔
گریمی ایوارڈ یافتہ گلوکارہ بیونسے مئی سے اپنے نئے البم ’رینیسانس‘ کی تشہیر کے سلسلے میں ورلڈ ٹور پر مختلف شہروں میں کنسرٹ کر رہی ہیں۔
