ممبئی: 18 سال بعد بالی وڈ اسٹارز اکشے کمار، گووندا اور پریش راول کی کامیڈی سے بھرپور فلم ’بھاگم بھاگ‘ کے سیکوئل کی تیاری شروع کر دی گئی۔
انڈین میڈیا کی رپورٹس کے مطابق 18 سال بعد اکشے کمار، گووندا اور پریش راول ایک ساتھ نظر آئیں گے۔ پچھلے دنوں خبریں سامنے آئی تھیں کہ اکشے کمار فلم کے حقوق حاصل کرنے پر کام کر رہے تھے اور اب سیکوئل کی باضابطہ تصدیق کر دی گئی۔
باضابطہ بیان میں بتایا گیا کہ فلمساز سریتا اشون کی کمپنی Roaring River Productions نے شیمارو انٹرٹینمنٹ سے حقوق حاصل کر لیے ہیں۔ سریتا اشون کچھ عرصے سے فلم کے اسکرپٹ پر کام کر رہی تھیں۔
سریتا اشون نے کہا کہ ’بھاگم بھاگ‘ جیسی اسپیشل فلم ایک سیکوئل کی مستحق ہے، جب ہم نے صحیح وقت سمجھا تو فیصلہ کیا کہ اسے کریں گے۔
دوسری جانب، شیمارو انٹرٹینمنٹ کے سی ای او ہیرین گڈا نے کہا کہ ہم ایک ایسی فلم بنانے کیلیے تجربہ کار ٹیم کے ساتھ کام کرنے کیلیے پرجوش ہیں۔
رپورٹس ہیں کہ ’بھاگم بھاگ‘ کے سیکوئل کا اسکرپٹ تقریباً تیار ہے اور اس میں آخری ترمیم کی جا رہی ہے۔ فلم 2025 کے وسط میں پروڈکشن کے مرحلے میں داخل ہو سکتی ہے۔
