امریکی صدر جوبائیڈن نے اپنے یوکرائنی ہم منصب ولادیمیر زیلنسکی سے کیف کے لیے واشنگٹن کی امداد میں سابقہ تاخیر کے لیے معذرت کی ہے اور اس بات پر زور دیا ہے کہ امریکا یوکرین کی حمایت سے "ہٹنے والا نہیں” ہے۔
دونوں رہنماؤں نے جمعہ کو پیرس میں ڈی-ڈے کی سالگرہ کی تقریبات کے موقع پر ملاقات کی جہاں امریکی صدر نے یوکرین کے الیکٹرک گرڈ کی تعمیر نو میں مدد کے لیے 225 ملین ڈالر کے امدادی پیکج کا اعلان کیا۔
بائیڈن نے اس بات پر زور دیا کہ امریکا روسی حملے کے خلاف یوکرین کے ساتھ کھڑا رہے گا۔
واشنگٹن نے فروری 2022 میں شروع ہونے والی روسی جارحیت کو روکنے میں مدد کے لیے کیف کو دسیوں ارب ڈالر فراہم کیے ہیں لیکن اس سال کے شروع میں، بائیڈن انتظامیہ کے لیے یوکرین کی مدد کے لیے دستیاب فنڈز کانگریس میں نئی امداد کی منظوری کے لیے تعطل کے دوران کم ہونے لگے۔
کچھ دائیں بازو کے قانون ساز یوکرین کے لیے امریکی حمایت پر شکوک کا اظہار کرتے رہے ہیں۔
وائٹ ہاؤس اور کانگریس کے رہنماؤں کے درمیان کئی مہینوں کی بات چیت کے بعد قانون سازوں نے اپریل میں 61 بلین ڈالر کا یوکرین فنڈنگ بل منظور کیا جس پر بائیڈن نے دستخط کر دیے۔ اس قانون نے اسرائیل کو 14 بلین ڈالر کی فوجی امداد بھی فراہم کی ہے۔
