واشنگٹن: امریکی صدر جو بائیڈن نے امریکیوں سے سیاسی ماحول ’کول ڈاؤن‘ کرنے کی اپیل کر دی ہے۔
غیر ملکی میڈیا رپورٹس کے مطابق امریکی صدر جو بائیڈن نے گزشتہ روز قوم سے خطاب میں کہا کہ شکر ہے حملے میں ٹرمپ شدید زخمی نہیں ہوئے، صدارتی انتخاب میں خطرات بہت زیادہ ہیں، سیاسی میدان کو مقتل گاہ نہیں بننا چاہیے۔
انھوں نے کہا گرما گرمی بہت ہوئی، اب سیاسی درجہ حرارت کو کم کیا جائے، اختلاف کا مطلب دشمنی نہیں گرما گرمی بہت ہوئی، اسے ٹھنڈا کرنے کا وقت آ گیا ہے۔
جو بائیڈن کا کہنا تھا کہ یہ مفاہمت کا وقت ہے کیوں کہ غیر ملکی ایکٹرز ہمارے درمیان اختلافات کو ہوا دے رہے ہیں، اختلافات بیلٹ باکس کے ذریعے حل کرتے ہیں، گولی سے نہیں۔
بائیڈن نے 7 منٹ سے بھی کم وقت کی تقریر میں کہا کہ ٹرمپ پر حملہ ہم سب سے ایک قدم پیچھے ہٹنے کا مطالبہ کرتا ہے، ہم اس تشدد کو معمول پر آنے کی اجازت نہیں دے سکتے، اس ملک میں سیاسی بیان بازی بہت بڑھ گئی ہے، اسے کول ڈاؤن کرنے کا وقت آ گیا ہے، یہ کرنا ہم سب کی ذمہ داری ہے۔
ڈونلڈ ٹرمپ پر حملے کے محرکات کے حوالے سے انھوں نے کہا کہ ہم اس بارے نہیں جانتے، یہ بھی نہیں کہ کس نے مدد فراہم کی؟ تاہم قانون نافذ کرنے والے ادارے تحقیقات کر رہے ہیں۔
