امریکی صدر ڈونلڈٹرمپ نے نومنتخب صدر جوبائیڈن کی تقریب حلف برداری میں شرکت سے انکار کر دیا۔
ٹوئٹر پر جاری بیان میں ڈونلڈ ٹرمپ نے لکھا کہ وہ سب لوگ جنہوں نے مجھ سے پوچھا تھا انہیں بتانا چاہتا ہوں 20 جنوری کو ہونے والی جوبائیڈن کی حلف برداری تقریب میں شریک نہیں ہوں گا۔
اس سے قبل کی گئی ٹوئٹ میں صدر ٹرمپ نے لکھا کہ جن محب وطن لوگوں نے مجھے ووٹ دیا ان کے ساتھ کسی قسم کا کوئی غیر منصفانہ اور ناجائز سلوک نہیں ہونے دیا جائے گا۔
To all of those who have asked, I will not be going to the Inauguration on January 20th.
— Donald J. Trump (@realDonaldTrump) January 8, 2021
امریکی میڈیا کے مطابق امریکی کانگریس نے جوبائیڈن کےصدر اور کاملا ہیرس امریکا کی نائب صدر بننے کی توثیق کردی، جس کے بعد جوبائیڈن آئینی طور پر امریکا کے 46ویں صدر بن گئے، امریکی کانگریس کے مطابق جوبائیڈن اور کاملا ہیرس 20جنوری کو حلف اٹھائیں گے۔
پندرہ دسمبر کو امریکہ میں الیکٹورل کالج کی سرکاری ووٹنگ مکمل ہونے کے بعد جوبائیڈن کو باضابطہ طور پر فاتح قرار دے دیا گیا تھا جبکہ ٹرمپ نے ایک بار پھر جوبائیڈن کو صدر ماننے سے انکار کیا تھا، جو بائیڈن نے 306 جبکہ صدر ٹرمپ نے 232 الیکٹورل ووٹ حاصل کئے تھے۔