لندن: عالمگیر وبا کروناوائرس کے خلاف بڑی پیش رفت سامنے آگئی، آکسفورڈ یونیورسٹی نے کروناویکسین تیار کرلی جس کی رواں ہفتے انسانوں پر آزمائش کی جائے گی۔
غیرملکی خبررساں ادارے کی رپورٹ کے مطابق برطانوی حکومت کے تعاون سے یونیورسٹی نے ویکسین تیار کی اور اب دیگر تجرباتی مراحل میں بھی وزارت صحت کا مکمل ساتھ حاصل ہے۔
برطانوی وزیرصحت میٹ ہینکوک نے پریس کانفرنس کرتے ہوئے کہا کہ وہ برطانیہ میں دنیا کی پہلی کرونا ویکسین کی کامیابی کو یقینی بنانے کے لیے سب کچھ قربان کررہے ہیں، ویکسین کی انسانوں پر ٹرائل کے لیے حکومت سائنس دانوں کو مزید 20 ملین پاؤنڈ دے گی جبکہ منصوبے کے دیگر مراحل کی تکمیل کے لیے 22.5 ملین پاؤنڈ فراہم کرے گی۔
آکسفورڈ یونیورسٹی کے ماہرین کرونا وائرس کی ویکسین تیار کرنے کے قریب
’’ChAdOx1 nCoV-19‘‘ نامی کروناویکسین کو 510 رضاکاروں پر آزمایہ جائے گا، ٹرائل کے پہلے مرحلے میں 112 افراد پر مشتمل گروہ تشکیل دیا گیا جس میں 18 سے 55 عمر کے شہری شامل ہیں۔
رپورٹ کے مطابق ویکسین کی کامیابی کی صورت میں یہ دنیا میں پہلی برطانوی ساختہ ویکسین ہوگی جس سے متعلق پوری دنیا نے امیدیں باندھ رکھی ہیں، مذکورہ ویکسین دنیا کو لاک ڈاؤن سے نکالنے میں کلیدی کردار ادا کرسکتی ہے۔
خیال رہے کہ دنیا بھر میں سب سے زیادہ متاثرہ ممالک میں برطانیہ کا نام بھی شامل ہے، جہاں مہلک وائرس سے اب تک 17 ہزار سے زائد افراد ہلاک ہوچکے ہیں جبکہ ملک میں مریضوں کی مجموعی تعداد ایک لاکھ سے تجاوز کرچکی ہے۔
