سان فرانسسکو: ٹوئٹر کو جہازی سائز کا نیا لوگو ’ایکس‘ اپنی عمارت سے اتارنا پڑ گیا۔
تفصیلات کے مطابق امریکی ریاست کیلیفورنیا کے شہر سان فرانسسکو میں قائم ٹوئٹر کی عمارت پر سے بڑے اور چمک دار لوگو ”ایکس“ کو اتار دیا گیا ہے۔
ایلون مسک نے ٹوئٹر کی چڑیا کی جگہ ’ایکس‘ کا نشان منتخب کیا ہے، اور اسے فروغ دینے کے لیے سان فرانسسکو میں قائم عمارت پر اسے نصب کر دیا گیا تھا، تاہم اس کے بعد سے عمارت کو درجنوں شکایات موصول ہونے لگی تھیں۔
”ایکس“ کا لوگو ایلون مسک کی کمپنی کی نمائندگی کرتا ہے، تاہم شکایات پر صدر دفتر کی عمارت سے اسے ہٹا دیا گیا ہے۔
روئٹرز کا کہنا ہے کہ ”ایکس“ ا تارنے سے قبل شکایت کنندگان سے ٹوئٹر کی جانب سے طویل بات چیت اور افہام و تفہیم کی کوششیں کی گئیں، تاہم مسئلے کا کوئی نتیجہ برآمد نہ ہونے پر یہ اقدام اٹھایا گیا، شکایات کا اندراج سان فرانسسکو کے سٹی بلڈنگ ڈپارٹمنٹ نے کیا تھا۔
واضح رہے کہ عمارت کے قریبی رہائش پذیر افراد نے ”ایکس“ کی روشنی کو اپنے روزمرہ کاموں کی انجام دہی میں مداخلت سے تعبیر کرتے ہوئے درجنوں شکایات درج کرائی تھیں، جن پر ایکشن لیا گیا۔
گزشتہ برس اکتوبر میں ایلون مسک نے ٹوئٹر کو خریدنے کے بعد اعلان کیا تھا کہ نئی کمپنی کو موجودہ صدر دفتر سے محروم نہیں کیا جائے گا، کیوں کہ سان فرانسسکو خوب صورت شہر ہے، تاہم اب اس عمارت کو اپنے لوگو سے محروم کر دیا گیا ہے۔
ترجمان سٹی ڈپارٹمنٹ آف بلڈنگ انسپکشن کا کہنا تھا کہ یکم اگست کی صبح کو بلڈنگ انسپکٹرز نے ”ایکس“ گرائے جانے کا منظر اپنی آنکھوں سے دیکھا، ترجمان کے مطابق یہ لوگو بلا اجازت عمارت پر نصب کیا گیا تھا۔
