متنازع بھارتی رئیلیٹی شو بگ باس اس بار نئے سیزن میں کچھ الگ کرنے جارہا ہے جو مداحوں کے ساتھ امیدواروں کے لیے حیران کن ہے۔
اطلاعات کے مطابق شو کا نیا سیزن 15 اکتوبر سے آن ایئر ہوگا اور اس بار گھر والوں کو باہر کے افراد سے رابطہ کرنے کا موقع دیا گیا ہے۔ سوشل میڈیا پر آنے والی تفصیلات میں بتایا گیا ہے کہ بگ باس کی تاریخ میں پہلی بار امیدوار اپنے ساتھ موبائل بھی رکھ سکیں گے۔
میکرز نے اب تک مکمل معلومات تو فراہم نہیں کی ہیں مگر بھارتی میڈیا نے ممکنہ اپ ڈیٹس کے حوالے سے آگاہ کیا ہے، بگ باس کا ہر نیا آنے والا سیزن پچھلے سیزن سے مختلف ہوتا ہے، رئیلیٹی شو اس بار بھی مختلف نظر آئے گا۔
عام طور پر بگ باس کے گھر میں سوشل میڈیا اور موبائل تک امیدواروں کی رسائی نہیں ہوتی، شو میں شامل افراد اپنے پیاروں سمیت مداحوں سے بھی رابطے میں نہیں رہ پاتے تھے لیکن اس بار ان کے پاس موبائل کی سہولت موجود ہوگی۔
بگ باس سے متعلق ایکس کے پیج ’بگ باس تک‘ نے اپنے مصدقہ اکاؤنٹ پر دعویٰ کیا ہے کہ 17ویں سیزن میں موبائل فونز استعمال کرنے کی اجازت ہوگی۔
دلچسپ بات یہ ہے کہ موبائل استعمال کرنے کی اجازت تمام امیدواروں کو نہیں بلکہ چند ایک کو ہوگی جو کہ مخصوص ٹاسک بخوبی سرانجام دیتے ہوئے جیتے گا۔
کچھ اپ ڈیٹس میں یہ بھی بتایا گیا ہے کہ اس بار امیدواروں کی سوشل میڈیا تک رسائی بھی ممکن ہوگی، جس کے بعد وہ اپنے متعلق جان سکیں گے اور یہ چیز انہیں اپنا گیم پلان بہتر بنانے میں مدد فراہم کرے گی۔
ہر بار کی طرح اس بار بھی شو کی میزبانی کے فرائض بالی وڈ کے سپر اسٹار سلمان خان انجام دیں گے جن کا بگ باس کی کامیابی میں بڑا کردار ہے۔
