ریاض: سعودی عرب میں مشرق وسطیٰ کا سب سے بڑا لیڈیز ڈرائیونگ اسکول کھول دیا گیا۔ اکیڈمی میں 100 فیصد عملہ سعودی شہریوں پر مشتمل ہے۔
سعودی ویب سائٹ کے مطابق سعودی عرب کے مشرقی ریجن کے شہر الاحسا میں مشرق وسطیٰ کا سب سے بڑا لیڈیز ڈرائیونگ اسکول کھولا گیا ہے۔
اسکول کو ’ایسٹرن پراونس ڈرائیونگ اکیڈمی‘ کا نام دیا گیا ہے، اسکول کی افتتاحی تقریب میں گورنر شہزادہ سعود بن نائف اور الاحسا کے کمشنر شہزادہ بن جلوی موجود تھے۔
ڈرائیونگ اکیڈمی کی عمارت 3 ہزار 500 مربع میٹر کے رقبے میں تعمیر کی گئی ہے جبکہ ٹریننگ کا میدان 50 ہزار مربع میٹر پر پھیلا ہوا ہے۔ اکیڈمی کو 115 گاڑیاں فراہم کی گئی ہیں جبکہ 11 انٹرا ایکٹو سمیلیٹر مہیا کیے گئے ہیں۔ ان کی مدد سے مشرقی ریجن کی خواتین حقیقی ڈرائیونگ کا تجربہ کریں گی۔
اکیڈمی میں پانچ اسمارٹ کلاسیں کھولی گئی ہیں۔ ایک کلینک، انٹرنیٹ کے ذریعے امتحان کا کمرہ، کانفرنس ہال اور رابطہ مرکز بھی قائم کیا گیا ہے۔
الاحسا میں قائم کی جانے والی اس لیڈیز ڈرائیونگ اکیڈمی کو ایک اعزاز یہ بھی حاصل ہے کہ یہاں 100 فیصد عملہ سعودی شہریوں پر مشتمل ہے۔ اس کی سرپرستی آرامکو کمپنی کر رہی ہے۔
آرامکو کے چیئرمین انجینیئر امین الناصر کا کہنا ہے کہ خادم حرمین شریفین نے خواتین کو ڈرائیونگ کی اجازت کا تاریخی فرمان جاری کر کے لاکھوں سعودی خواتین اور لڑکیوں کے لیے ترقی کے امکانات روشن کردیے۔
ان کے مطابق اس کی بدولت یہ خواتین اپنے قدموں پر کھڑی ہو رہی ہیں۔ اس فیصلے کا سعودی معیشت، ترقی اور کاروبار کے ماحول پر بڑا خوشگوار اثر مرتب ہو رہا ہے۔
