بہار: بھارتی ریاست بہار کے ایک اسکول کے بچوں کو مٹی کے تیل والا کھانا کھلایا گیا، جس پر 184 بچے بری حالت میں اسپتال پہنچ گئے۔
بھارتی میڈیا رپورٹس کے مطابق ریاست بہار کے ضلع چمپارن کے علاقے بگہا میں ایک افسوس ناک واقعہ پیش آیا ہے، سرکاری مڈل اسکول میں پیر کے روز دوپہر کا کھانا کھا کر دو سو کے قریب بچے شدید بیمار پڑ گئے، جس پر انھیں فوری طور پر اسپتال پہنچایا گیا۔
ضلع مجسٹریٹ نے واقعے کی تحقیقات کا حکم دے دیا ہے اور کہا ہے کہ قصورواروں کو بخشا نہیں جائے گا، پولیس کے مطابق بانس گاؤں پارسونی مڈل اسکول میں پیر کو دوپہر کا کھانا کھانے کے بعد بچوں نے الٹی دست اور پیٹ درد کے ساتھ چکر آنے کی شکایت کی۔ حکام کے مطابق دوپہر کے مینو میں دال چاول اور سبزی شامل تھی، بچوں نے شکایت کی تھی کہ اس میں سے مٹی کے تیل کی بو آ رہی ہے۔
راہول گاندھی سائیکل پر کوئلہ ڈھونے لگے
والدین کو واقعے کی جیسے ہی اطلاع ملے وہ دوڑتے دوڑتے اسکول پہنچے اور انھوں نے بیمار بچوں کو اسپتال پہنچایا، مغربی چمپارن کے ضلع تعلیمی افسر رجنی کانت نے بتایا کہ ابتدائی طور پر انکشاف ہوا ہے کہ کھانے میں مٹی کا تیل گر گیا تھا۔
حکام کا کہنا تھا کہ بچوں کو طبی امداد دیے جانے کے بعد انھیں گھر بھیج دیا گیا ہے، اور بچوں کی حالت خطرے سے باہر ہے۔ پولیس نے اسکول کے ہیڈماسٹر کو پوچھ گچھ کے لیے حراست میں لے لیا جب کہ ڈسٹرکٹ مجسٹریٹ نے ضلعی تعلیمی افسر کو واقعے کی تحقیقات کرنے کا حکم دے دیا ہے۔
