The news is by your side.

Advertisement

اسپائیڈر گرل کے نام سے مشہور اضافی بازوؤں اور ٹانگوں والی بچی کی ویڈیو وائرل

بہار: بھارتی ریاست بہار سے تعلق رکھنے والی اسپائیڈر گرل کے نام سے مشہور عجیب الخلقت بچی کی ویڈیو وائرل ہو گئی۔

بھارتی میڈیا کے مطابق ڈھائی سالہ بچی بہار کے نیواڈا ضلع میں پیدا ہوئی تھی، لڑکی کو اسپائیڈر گرل کہا جا رہا ہے کیوں کہ اس کی پیدائش پیٹ سے جڑے ہوئے دو اضافی بازوؤں اور دو ٹانگوں کے ساتھ ہوئی تھی۔

ایک مقامی نیوز چینل نے ٹویٹر پر لڑکی کی ویڈیو شیئر کی جو وائرل ہو گئی، ویڈیو میں لڑکی کو عام بچوں کی طرح چلتے پھرتے اور روزمرہ کام کرتے دیکھا جا سکتا ہے۔

جب اس لڑکی کی پیدائش ہوئی تھی تو اس غریب خاندان کے لیے یہ ایک صدمہ تھا، اس کے جسم سے جڑے ہوئے اضافی بازو اور ٹانگیں حرکت نہیں کر سکتیں۔

غربت کی وجہ سے بچی کے والدین اس کی سرجری بھی نہیں کروا سکے تھے، ڈاکٹروں کا کہنا تھا کہ چھوٹی بچی کو پولیمیلیا ہے، یہ ایک پیدائشی نقص ہے جس میں بچے عام اعضا کی تعداد سے زیادہ کے ساتھ پیدا ہوتے ہیں۔

لیکن اس خاندان کی خوش قسمتی سے کرونا وبا کے دوران ملک بھر میں امدادی سرگرمیاں انجام دینے والے بولی ووڈ اداکار سونو سود اس لڑکی کی سرجری کے سلسلے میں بھی مدد کو آ گئے ہیں، سونو سود نے لڑکی کا علاج کرنے والے ڈاکٹروں کی تصویر بھی پوسٹ کی، اور تصویر کے ساتھ انھوں نے لکھا ’ٹینشن نہ لیں، بس دعا کریں‘۔

Comments

یہ بھی پڑھیں