ساہیوال : صوبہ پنجاب کے شہر ساہیوال کے قریب کراچی ایکسپریس ٹرین کی زد میں آکرموٹرسائیکل سوار جان کی بازی ہار گیا۔
تفصیلات کے مطابق ساہیوال کے نواحی علاقہ گیمبر میں موٹر سائیکل سوار لاہور سے کراچی جانے والی کراچی ایکسپریس کی زد میں آکرموقع پرہی جاں بحق ہوگیا۔ افسوس ناک حادثے میں جاں بحق ہونے والے کی شناخت لیاقت کے نام سے ہوئی ہے۔
عینی شاہدین کے مطابق موٹرسائیکل سوار شخص ریلوے پھاٹک بند ہونے کے باوجود پھاٹک پھلانگ کر ریلوے لائن کراس کررہا تھا کہ ٹرین کی زد میں آگیا۔
حادثے کے بعد ٹرین کو معمول کی کارروائی کے بعد کراچی روانہ کردیا گیا ہے، مذکورہ پھاٹک پر آئے روز ایسے واقعات معمول بنتے جا رہے ہیں۔
ملتان: ٹرین کی زد میں آکر 4 افراد جاں بحق ہوگئے
یاد رہے کہ گزشتہ سال 21 نومبر2018 کو صوبہ پنجاب کے شہر ملتان میں انصاری چوک پھاٹک پر ٹرین کی زد میں آکر چار افراد جان کی بازی ہار گئے تھے۔
واضح رہے کہ فروری 2017 میں پنجاب میں رکشہ لاہور سے کراچی آنے والی فرید ایکسپریس کی زد میں آگیا تھا، جس کے نتیجے میں 5 افراد جاں بحق اور 2 زخمی ہوگئے تھے۔
