اسلام آباد: پاکستان پیپلز پارٹی کے چیئرمین بلاول بھٹو زرداری نے یوسف رضا گیلانی کی جیت کے بعد وزیر اعظم کے استعفے کی بات کرتے ہوئے کہا ہے کہ اب عمران خان کو استعفیٰ دے دینا چاہیے، ہم ان کے خلاف تحریک عدم اعتماد کا ہتھیار استعمال کریں گے۔
سینیٹ الیکشن کے بعد اسلام آباد میں میڈیا سے گفتگو کرتے ہوئے بلاول بھٹو نے کہا عمران خان کو ہار مان لینی چاہیے اور چیلنج کرنے کے نخرے نہیں کرنے چاہئیں، وہ ایوان میں ہار چکے ہیں اور قومی اسمبلی میں پورے پاکستان کے نمائندے ہوتے ہیں، یوسف رضاگیلانی کی کامیابی پورے پاکستان کی کامیابی ہے۔
انھوں نے کہا پی ڈی ایم نے سینیٹ انتخابات کے بعد لانگ مارچ کا سوچ لیا تھا، اب ہم تحریک عدم اعتماد کا ہتھیار استعمال کریں گے، میں سمجھتا ہوں پی ڈی ایم کا مستقبل روشن ہے، موجودہ حکومت کوگھر بھیجنے کے دن قریب آ گئے۔
سینیٹ الیکشن میں بڑا اپ سیٹ، یوسف رضاگیلانی کامیاب
بلاول کا کہنا تھا کہ آج حکومت اپنے ہی پارلیمان سے ہار چکی ہے، جمہوریت کی آواز بلند ہو گئی، پارلیمنٹ کے وقار میں اضافہ ہوا، پیپلز پارٹی کا ہمیشہ مؤقف رہا کہ جمہوریت بہترین انتقام ہے، ہم یوسف رضا گیلانی کو چیئرمین سینیٹ بھی منتخب کرائیں گے، آج کی شکست کے بعد عمران خان کو استعفیٰ دینا چاہیے۔
پی پی چیئرمین نے کہا عمران خان کو اپنی پارلیمنٹ سے شکست دلوانا پی ڈی ایم کی تاریخی فتح ہے، حکومت کی پالیسیوں پر عدم اعتماد کا نتیجہ آج سب نے دیکھا، یہ موجودہ وزیر خزانہ کی بھی ناکامی ہے، پی ٹی آئی کا آئی ایم ایف پیکیج بھی رد کر دیا گیا ہے۔
سینیٹ کی نشست جیتنے والے یوسف رضا گیلانی نے کہا وزیر اعظم کے خلاف عدم اعتماد کا ہتھیار کب استعمال کرنا ہے، یہ فیصلہ مشاورت سے کریں گے، اسمبلیاں توڑنے کے دعوے دار وزیر اعظم ہمت کریں اور اسمبلیاں توڑ دیں، وزیر اعظم کی معاشی پالیسیاں ناکام ہو چکی ہیں، انھیں اخلاقی طور پر مستعفی ہو جانا چاہیے۔
