کراچی: پاکستان پیپلزپارٹی کے انٹرا پارٹی انتخابات میں کامیابی حاصل کرنے کے بعد بلاول بھٹو چیئرمین جبکہ آصف علی زرداری پیپلزپارٹی پارلیمنٹیرین کے صدر منتخب ہوگئے۔
تفصیلات کے مطابق پیپلزپارٹی کے انٹر پارٹی کا انعقاد کیا گیا، جس میں کارکنان نے اپنا حق رائے دہی استعمال کرتے ہوئے بلاول بھٹو کی قیادت پر اعتماد کا اظہار کرتے ہوئے انہیں چار سال کے لیے چیئرمین منتخب کیا۔
انتخابات کے نتائج کے مطابق سابق صدر آصف علی زرداری پیپلزپارٹی پارلیمنٹیرین کے صدر منتخب ہوئے جبکہ نیئر حسین بخاری اور فرحت اللہ بابر سیکریٹری جنرل کا عہدہ حاصل کرنے میں کامیاب رہے۔علاوہ ازیں سلیم مانڈوی والا سیکریٹری خزانہ اور مولا بخش چانڈیو سیکریٹری اطلاعات کی نشست پر کامیاب قرار پائے۔
یاد رہے بلاول بھٹو زرداری کی صلاحیتوں کو مدنظر رکھتے ہوئے پی پی قیادت اور کارکنان نے انہیں پہلے ہی چیئرمین منتخب کیا تھا۔خیال رہے الیکشن کمیشن آف پاکستان میں رجسٹرڈ تمام جماعتوں کو انٹرا پارٹی الیکشن کا انعقاد کرنا ضروری ہوتا ہے جس کےنتائج الیکشن کمیشن میں جمع کروائے جاتے ہیں۔
