اسلام آباد : پیپلز پارٹی نے چیئرمین سینیٹ کے لیے امیدوار کے نام کا اعلان کردیا، صادق سنجرانی چیئرمین جبکہ سلیم مانڈی والا ڈپٹی چیئرمین سینیٹ کے مشترکہ امیدوار ہوں گے۔
تفصیلات کے مطابق پاکستان پیپلز پارٹی کے چیئرمین بلاول بھٹو زرداری نے چیئرمین سینیٹ کیلئے صادق سنجرانی کی حمایت کا اعلان کر تے ہوئے سینیٹر سلیم مانڈوی والا کو ڈپٹی چیئرمین سینیٹ کا امیدوار نامزد کر دیا ہے۔
انہوں نے کہا کہ چیئرمین اور ڈپٹی چیئرمین کے لیے ہمیں اکثریت حاصل ہے، آج پہلا قدم ہے، چیئرمین بنا کر مزید اور کام بھی کریں گے۔ وفاق نے 90 فیصد بجٹ پنجاب میں خرچ کیا ہے ہم چاہتے ہیں دوسرے صوبوں کو بھی ان کا حق دیا جائے۔
اسلام آباد میں وزیر اعلیٰ بلوچستان عبدالقدوس بزنجو کے ساتھ پریس کانفرنس کرتے ہوئے چیئرمین پیپلز پارٹی بلاول بھٹو نے کہا کہ اپوزیشن کا متفقہ امیدوار مسلم لیگ (ن) کے امیدوار کیساتھ مقابلہ کرے گا، سابق سینیٹر رضا ربانی کو پارٹی نے دوہزار اٹھارہ کے الیکشن کا ٹاسک دیا ہے۔
ان کا مزید کہنا تھا کہ ہم چاہتے ہیں کہ ہماری اولین ترجیح ہے کہ بلوچستان کے مسائل حل ہوں، اور ہم مل کر ہی ان مسائل کو حل کر سکتے ہیں۔ ہمارے اس اقدام سے بلوچستان کے عوام کے احساس محرومی کا مداوا ضرور ہو گا۔
اس موقع پر وزیراعلیٰ بلوچستان عبدالقدوس بزنجو نے کہا کہ پیپلز پارٹی نے بہت بڑی قربانی دے کر بلوچستان کے عوام کے دل جیت لئے ہیں۔
آصف علی زرداری نے پہلے بھی بلوچستان کیلئے بہت کام کیا ہے، اٹھارہویں ترمیم ہو یا پھر بلوچستان پیکیج جو کہ پی پی کا ایک بہت بڑا کارنامہ تھا۔
