واشنگٹن : پاکستان کے سفارتی وفد کے سربراہ بلاول بھٹو نے کہا ہے کہ پاکستان امن کا خواہاں ملک ہے بھارت سے تمام معاملات پر بات چیت کیلئے تیار ہیں۔
یہ بات انہوں نے واشنگٹن میں پریس کانفرنس سے خطاب کرتے ہوئے کہی انہوں نے کہا کہ بھارت سے تمام معاملات پر بات چیت کیلئے تیار ہیں، بھارت کو اپنے طیارے گرنے کا اعتراف کرنے میں ایک ماہ کا وقت لگا۔
بلاول بھٹو نے کہا کہ بھارت پاکستان میں دہشت گردی کی کارروائیوں میں ملوث ہے، بھارتی حاضر سروس نیول آفیسر کلبھوشن یادیو کو بلوچستان سے گرفتار کیا گیا تھا۔
پاکستانی وفد کے سربراہ کا کہنا تھا کہ اب بھارت پانی کو بطور ہتھیار استعمال کررہا ہے، 24کروڑ پاکستانیوں کا پانی روکنے کا اقدام کھلی جارحیت ہے، کوئی بھی ملک یکطرفہ طور پر سندھ طاس معاہدہ معطل نہیں کرسکتا، بھارت اپنے عوام سمیت عالمی برادری سے جھوٹ بول رہا ہے۔
انہوں نے کہا کہ بھارتی وزیراعظم مسلسل دھمکی آمیز رویہ اختیارکیے ہوئےہیں، پاکستان،بھارت کشیدگی کے دوران بھارتی میڈیا مسلسل جھوٹ بولتا رہا، دہشت گردی کا کسی مذہب یا ملک سے کوئی تعلق نہیں، پاکستان دہشت گردی سے سب سے زیادہ متاثرملک ہے۔
بلاول بھٹو کا کہنا تھا کہ بھارت نے جنوبی ایشیا میں خود کو بطور واحد سیکیورٹی فراہم کنندہ پیش کیا، امریکی ٹیکس پیئرزکا پیسہ بھارتی معیشت، ملٹری انڈسٹریل کمپلیکس سبسیڈائز کرتا ہے، بھارت کو نام نہاد نیٹ سیکیورٹی پروائیڈر کے کردار کے نام پر امریکی ڈالر ملتے ہیں۔
پاک بھارت جبگ سے متعلق انہوں نے بتایا کہ 5 روز کی جنگ نے بھارت کو بےنقاب کردیا، بھارت سیکیورٹی فراہم کنندہ نہیں بلکہ جنوبی ایشیا میں عدم تحفظ کا ذریعہ ہے۔
اس نے جھوٹ کی بنیاد پرجنگ شروع کی اوراس میں بھی ناکامی کاسامنا کرنا پڑا، خطے کو نیٹ سیکیورٹی فراہم کرنے کادعویٰ کرنے والا بھارت اپنے طیاروں کو نہ بچا سکا۔
