کاغان : پاکستان پیپلز پارٹی کے چیئرمین بلاول بھٹو زرداری نے کہا ہے کہ ن لیگ نے میثاق جمہوریت پر پیپلزپارٹی کے ساتھ دھوکا کیا جبکہ عمران خان کے نظریے اور پیغام میں تضاد ہے، سپریم کورٹ نواز شریف کے توہین عدالت کے بیانات پر سوموٹو ایکشن لے۔
ان خیالات کا اظہار انہوں نے کاغان میں جلسہ عام کے بعد میڈیا سے گفتگو کرتے ہوئے کیا، بلاول بھٹو نے کہا کہ پیپلزپارٹی آئندہ الیکشن میں اکثریت کے ساتھ حکومت میں آکر نظریے پر کام کریگی، عوام نے ہمارا ساتھ دیا تو خدمت کی نئی تاریخ رقم کریں گے۔
ملک میں جمہوری نظام کو کوئی خطرہ نہیں یہ صرف تخت رائیونڈ کی لڑائی ہے، انہوں نے کہا کہ پیپلزپارٹی میثاق جمہوریت سے پیچھے نہیں ہٹی بلکہ ن لیگ نے میثاق جمہوریت پر پیپلزپارٹی کے ساتھ دھوکا کیا، انتخابات وقت پر ہوں گے، پارلیمنٹ کو اپنی مدت پوری کرنی چاہئے۔
بلاول بھٹو نے کہا کہ نوازشریف اپنی ہر تقریر میں توہین عدالت کے مرتکب ہوئے ہیں جس پر سپریم کورٹ ان کے خلاف سوموٹو ایکشن لے، قانون سب کے لئے ایک جیسا ہونا چاہئے۔
انہوں نے کہا کہ عمران خان کو سندھ میں ویلکم کرتے ہیں، لیکن سندھ کے عوام کپتان کو قبول نہیں کریں گے کیونکہ چیئرمین پی ٹی آئی جو کہتے ہیں اس پر عمل نہیں کرتے، عمران خان نئے پاکستان اور کرپشن کیخلاف بات کرتے ہیں، ان کے قول و فعل میں تضاد ہے میری دعا ہے سندھ میں عمران خان کا جلسہ کامیاب ہو۔
ان کا کہنا تھا کہ کرپشن پر سندھ کے جس سابق وزیراعلیٰ کو نکالا گیا وہ عمران خان کے ساتھ ہے، ہم بہت جلد خیبرپختون خوا میں پیپلزپارٹی کی بنیاد رکھیں گے اور پھر عمران خان کا رونا دھونا شروع ہوجائے گا۔
