وزیر خارجہ بلاول بھٹو زرداری سے برطانیہ کے وزیر مملکت برائے خارجہ لارڈ طارق احمد نے نیویارک میں ملاقات کی۔
ملاقات میں پاک برطانیہ تعلقات، دو طرفہ تعاون اور سیلاب متاثرین کی بحالی پربات چیت کی اور باہمی دلچسپی کے امور پر تبادلہ خیال کیا گیا۔
لارڈ طارق احمد برطانوی وزیر اعظم کے تنازعات میں جنسی تشدد کی روک تھام کے خصوصی نمائندہ بھی ہیں۔
دوسری جانب بلاول بھٹو نے اقوام متحدہ جنرل اسمبلی کے 77ویں اجلاس کے صدر کسابا کوروسی سے بھی ملاقات کی۔
ملاقات میں وزیر خارجہ بلاول بھٹو نے میں تباہ کن سیلاب پر پاکستان سے اظہار یکجہتی کیلئے قرارداد کی منظوری پر کسابا کوروسی کا شکریہ ادا کیا جبکہ دوطرفہ سطح پر موسمیاتی تغیر کے اثرات، آبی بحران، پائیدار ترقی کے اہداف سمیت متعدد امور پر گفتگو کی۔
ترجمان دفتر خارجہ کے مطابق صدر جنرل اسمبلی نے پاکستان کی گروپ آف 77 پلس چین فورم کی کامیاب قیادت کو سراہا اور وزیر خارجہ کو مارچ 2023ء میں اقوام متحدہ آبی کانفرنس میں شرکت کی دعوت بھی دی ۔
