اسلام آباد: وزیر خارجہ بلاول بھٹو کا کہنا ہے کہ ملک کے ہر شعبے میں خواتین کی شمولیت ضروری ہے، تعلیم یافتہ اور خود اعتماد خواتین پاکستان کی ترقی میں اہم کردار ادا کر سکتی ہیں۔
تفصیلات کے مطابق وزیر خارجہ بلاول بھٹو نے خواتین کے عالمی دن کے موقع پر اپنے پیغام میں کہا ہے کہ خواتین کی بھرپور شرکت کے بغیر ملک کو ترقی یافتہ بنانے کا خواب پورا نہیں ہو سکتا۔
وزیر خارجہ کا کہنا تھا کہ ملک کے ہر شعبے میں خواتین کی شمولیت ضروری ہے، تعلیم یافتہ اور خود اعتماد خواتین پاکستان کی ترقی میں اہم کردار ادا کر سکتی ہیں۔
انہوں نے کہا کہ پیپلز پارٹی خواتین کی قدر و منزلت کے حوالے سے منفرد تاریخ رکھتی ہے، مسلم دنیا کی پہلی منتخب خاتون وزیر اعظم پیپلز پارٹی کا اعزاز ہے، اسلامی دنیا کی پہلی خاتون اسپیکر، ڈپٹی اسپیکر اور وزیر خارجہ بنانا بھی پیپلز پارٹی کا طرہ امتیاز ہے۔
بلاول بھٹو کا مزید کہنا تھا کہ شہید بے نظیر بھٹو کا خواب تھا کہ خواتین کو زندگی کی ہر شعبے میں برابری حاصل ہو۔
