The news is by your side.

Advertisement

چیئرمین پی پی نے بلدیاتی بل پر بے جا تنقید مسترد کر دی

کراچی: چیئرمین پیپلز پارٹی بلاول بھٹو نے بلدیاتی بل پر بے جا تنقید مسترد کر دی۔

تفصیلات کے مطابق بلاول بھٹو نے پارٹی رہنماؤں کو بلدیاتی بل کی حمایت کے لیے میدان میں اترنے کی ہدایت کرتے ہوئے بل پر بے جا تنقید کو مسترد کر دیا۔

چیئرمین پیپلز پارٹی نے کہا مخالفین بل کی مخالفت کی آڑ میں انتشار پیدا کرنا چاہتے ہیں، وہ خود کچھ کرتے ہیں نہ کسی اور کو کرنے دیتے ہیں، ہم نے بلدیاتی اداروں کو انتظامی، مالی اور سیاسی طور پر مستحکم کیا ہے۔

بلاول بھٹو نے رہنماؤں اور کارکنان کو ضلعی سطح پر عوام کو بل سے متعلق معاملات سمجھانے اور بل کے حق میں عوامی رابطہ مہم کی ہدایت جاری کی۔

چیئرمین پیپلز پارٹی بلاول بھٹو زرداری نے پریس کانفرنس میں کہا کہ سندھ بلدیاتی ایکٹ میں سب سے زیادہ سہولتیں دے رہا ہے، لوکل باڈی الیکشن میں کو چیئرمین ہوں گے، لوکل کونسلز کو ہیلتھ، تعلیم، قانون نافذ کرنے والے جواب دہ ہوں گے، سندھ بلدیاتی ایکٹ کو کالا قانون کہنے والوں کا منہ کالا ہوگا، ہم چاہتے ہیں لوکل گورنمنٹ اپنا ریونیو خود بنائے، اختیارات نچلی سطح پر منتقل ہوں گے تو مسائل جلد حل ہوں گے۔

ادھر سندھ لوکل گورنمنٹ ترمیمی بل کے خلاف پی ٹی آئی متحرک ہو گئی ہے، ارکان نے قومی اسمبلی میں بل کے خلاف قرارداد لانے کا فیصلہ کیا ہے، اس سلسلے میں آج پی ٹی آئی کراچی کی کور کمیٹی کا خرم شیر زمان کی زیر صدارت اجلاس منعقد ہوا۔

اجلاس میں سندھ لوکل گورنمنٹ بل کے خلاف لائحہ عمل پر مشاورت کی گئی، پی ٹی آئی 19 دسمبر کو دن 12 بجے سندھ اسمبلی کے باہر احتجاج کرے گی، اجلاس میں ضلعی صدور کو احتجاج کے لیے خصوصی ٹاسک دے دیا گیا، ارکان اسمبلی کو بھی کارکنان اور عوام کی شرکت کو یقینی بنانے کی ہدایت کی گئی ہے۔

Comments

یہ بھی پڑھیں