The news is by your side.

Advertisement

پی ڈی ایم نے استعفے جمع کرانے کا حتمی فیصلہ کرلیا، بلاول بھٹو

لاہور : پاکستان پیپلز پارٹی کے چیئرمین بلاول بھٹو زرداری نے کہا ہے کہ پی ڈی ایم نے فیصلہ کرلیا ہے کہ31دسمبر کو سب استعفیٰ جمع کرائیں گے،13دسمبر کو لاہور میں تاریخی جلسہ ہوگا۔

جاتی امراء میں ن لیگ کی نائب صدر مریم نواز کے ساتھ مشترکہ پریس کانفرنس سے خطاب کرتے ہوئے چیئرمین پیپلز پارٹی نے کہا کہ آج ہم مریم نواز سے تعزیت کرنے آئے تھے، پاکستان کے عوام جمہوریت اور جمہوری جماعتوں کے ساتھ ہیں۔

بلاول بھٹو نے کہا کہ گلگت بلتستان کے الیکشن میں جب گیا تو خبریں چل رہی تھیں کہ ہم پی ڈی ایم چھوڑدیں گے لیکن اب پی ڈی ایم نے فیصلہ کرلیا ہے کہ31دسمبر کو سب استعفیٰ جمع کرائیں گے، اس فیصلے میں پی پی پی بھی شامل ہے۔

پی ڈی ایم میں شامل تمام جماعتوں نے پارٹی سی ای سی اجلاسوں کا فیصلہ کیا ہے، اجلاس میں فیصلہ کیا جائے گا کہ سندھ حکومت کی قربانی دیں یا نہیں، استعفوں سے متعلق معاملات کا سی ای سی اجلاسوں میں غور ہوگا۔ سندھ حکومت اور قومی اسمبلی سے استعفوں کا معاملہ سی ای سی اجلاس میں رکھوں گا۔

انہوں نے کہا کہ پی ڈی ایم کا پہلا فیز کامیابی اور تیزی سے آگے بڑھ رہا ہے، دوسرے فیز میں جو اقدامات کررہے ہیں وہ سب کو پتہ لگ جائیں گے، جمہوری جماعتیں ہرگز نہیں چاہیں گے کہ کوئی اور فائدہ اٹھائے۔

چیئرمین پیپلزپارٹی نے مزید کہا کہ پی ڈی ایم حکومت کو بتائے گی کہ ان کا نہیں بلکہ عوام کا حکم چلتا ہے، حکومت سے بات کرنے کا وقت بہت پہلے ہی چلا گیا ہے۔

بلاول بھٹو نے کہا کہ پی ڈی ایم کے قیام کے وقت سے دراڑ پیدا ہونے کےخواب دیکھے جارہے ہیں،13دسمبر کو مینار پاکستان پر پی ڈی ایم کا جلسہ ہرصورت میں ہوگا، جس نےجو کرنا ہے کرلے میرے پیچھے آصفہ ہے، بھائی کو بہن سے طاقت ملتی ہے۔

Comments

یہ بھی پڑھیں