کراچی: بلاول بھٹو زرداری اور آصف علی زرداری کی زیرِ صدارت پاکستان پیپلز پارٹی کے اجلاس میں فیصلہ کیا گیا ہے کہ پارلیمنٹ میں مبینہ دھاندلیوں کے خلاف احتجاج کیا جائے گا، پارٹی چیئرمین بلاول بھٹو نے کہا کہ پیپلز پارٹی کو پارلیمنٹ سے آؤٹ کرنے کی بھرپور کوشش کی گئی۔
تفصیلات کے مطابق کراچی میں پیپلز پارٹی کا اہم اجلاس منعقد ہوا، اجلاس میں فیصلہ کیا گیا کہ پارلیمنٹ کے محاذ پرعوام کے حقوق کی جدوجہد جاری رکھی جائے گی، پیپلز پارٹی پارلیمنٹ کے اندر رہ کر اپوزیشن جماعتوں کو ساتھ لے کر چلے گی۔
اجلاس سے خطاب کرتے ہوئے بلاول بھٹو نے کہا ’آئینی اداروں کا احترام کیا اور کرتے رہیں گے، ہم پارلیمانی سیاست پر مکمل یقین رکھتے ہیں، ہم آمریت سے لولی لنگڑی جمہوریت بہتر سمجھتے ہیں، محاذ آرائی مسائل کا حل نہیں بلکہ مذاکرات سے مسائل کا حل نکلتا ہے۔‘
بلاول کا کہنا تھا کہ پیپلز پارٹی ایک سوچ کا نام ہے جسے ختم نہیں کیا جا سکتا، جمہوریت کی مضبوطی پیپلز پارٹی کی سوچ ہے، پیپلز پارٹی کی طاقت عوام ہے، ہم عوام کی خدمت کرنے پر ہی یقین رکھتے ہیں۔
کارکنان انتخابات میں بے ضابطگی کے شواہد پارٹی الیکشن سیل کو بھیجیں، بلاول بھٹو
بلاول بھٹو زرداری نے کہا کہ ہم نے ہمیشہ اداروں کا احترام کیا، اداروں کو مضبوط کرنے سے ہی جمہوریت مضبوط ہوتی ہے، ہم محاذ آرائی کی طرف نہیں جائیں گے بلکہ پارلیمنٹ میں احتجاج کریں گے۔
