لاہور : پاکستان پیپلزپارٹی کے چیئرمین بلاول بھٹو زرداری نے کہا ہے کہ پیپلزپارٹی جیتی تو جنوبی پنجاب کو الگ صوبہ بنائیں گے، نوازشریف اپنے مفادات کی سیاست کررہے ہیں۔
ان خیالات کا اظہار انہوں نے لاہور میں میڈیا سے گفتگو کرتے ہوئے کیا، بلاول بھٹو نے کہا کہ خلائی خلوق سے متعلق نوازشریف نے جو کہنا ہے وہ صاف صاف کہیں، نظریاتی سیاست کرنی ہے تو ذاتی مفادات کی سیاست نہیں چلے گی۔
بلاول بھٹوزرداری کا مزید کہنا تھا کہ ملک میں ہونے والے انتخابات کے حوالے سے پرامید ہوں کہ عوام ہمیں منتخب کریں گے، انشاءاللہ اگلی حکومت پاکستان پیپلزپارٹی کی ہوگی.
اگر ہم حکومت بنانے میں کامیاب ہوگئے تو ہم جنوبی پنجاب کا صوبہ بنادیں گے اور اگر اپوزیشن بینچوں پر بھی بیٹھے تو حکومت کو للکاریں گے، امید ہے پاکستان کے عوام میرا ساتھ دیں گے۔
ایک سوال کے جواب میں ان کا کہنا تھا کہ پی ٹی آئی کو اب کیوں یہ صوبہ یاد آیا ؟ اس سے پہلے یہ لوگ کہاں تھے؟ چیئرمین نیب کو پارلیمنٹ میں بلائے جانے کے معاملے پر ان کا کہنا تھا کہ پارلیمنٹ کو اختیار ہے کہ وہ کسی کو بھی طلب کرسکتا ہے، جب ہم نیب میں اصلاحات چاہتے تھے تو اس وقت نوازشریف نے ہماری مخالفت کی.
انہوں نے کہا کہ پیپلزپارٹی کہتی رہی کہ پارلیمنٹ کو مضبوط کریں، پارلیمنٹ کمزور ہے تو جمہوریت بھی کمزور ہے، سارے مسائل کا حل مضبوط جمہوریت میں ہے اور یہ کام صرف اور صرف پیپلزپارٹی ہی کرسکتی ہے کیونکہ پیپلزپارٹی ایشوز کی سیاست کرتی ہے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
