کراچی: چیئرمین پیپلزپارٹی بلاول بھٹو کا کہنا ہے کہ اگر وزیر اعلیٰ سندھ سے کوئی شکایت ہے تو میرے پاس آئیں کہیں اور جاکر چغلی کرنے کی ضرورت نہیں۔
اے آر وائی نیوز کے مطابق کراچی میں تاجروں سے خطاب کرتے ہوئے چیئرمین پیپلزپارٹی بلاول بھٹو زرداری نے کہا کہ سندھ حکومت کو اپنا مخالف نہیں ساتھی سمجھیں، تھوڑی سی محبت جو آپ ایم کیو ایم اور پی ٹی آئی کو دکھاتے تھے کہیں نہ کہیں دل میں ٹی ایل پی بھی بستی ہے اتنی ہی محبت ہمیں بھی دکھائیں۔
انہوں نے کہا کہ ہم دودھ کے دھلے نہیں تو اتنے برے بھی نہیں ہیں، میں نے شارٹ ٹرم نہیں لمبی اننگز کھیلنی ہے۔
انہوں نے کہا کہ جس طریقے سے یہ شہر چلتا تھا وہ تاریخ کا حصہ ہے اب تاجروں سے بھتہ نہیں مانگا جارہا اب آپ کی زندگی کو کوئی خطرہ نہیں، اب زبردستی صنعت بند نہیں ہوتی، مزدوروں کو زبردستی جلسے میں نہیں لایا جاتا تو اس میں ہمارا بھی کردار ہے۔
بلاول نے کہا کہ کیا میں نے کبھی آپ کو تنگ کیا؟ میں کیوں چاہوں گا کہ میرے نام پر اور حکومت کے نام پر آپ کو کوئی تنگ کرے۔
چیئرمین پیپلزپارٹی نے کہا کہ سندھ حکومت کے پبلک پرائیویٹ پارٹنر شپ منصوبے منافع میں ہیں، یہاں اسلام آباد میں فیصلے کیے جاتے ہیں ٹیرف سیٹ کیے جاتے ہیں ہم سے مشورے کے بغیر پالیسیاں بنائی جاتی ہیں اور نقصان سب اٹھاتے ہیں جتنا سعودی عرب کے پاس تیل ہے اتنا سندھ کے پاس کوئلہ ہے، ہمارا مطالبہ ہے کہ بجلی دیں اور سستی بجلی دیں۔
بلاول بھٹو نے کہا کہ وزیراعظم اور وزیر ڈھٹائی سے کہتے ہیں کہ ہم نے پاکستان سے لوڈ شیڈنگ ختم کردی آپ مجھے سندھ یا کوئی ایک شہر بتادیں جہاں لوڈ شیڈنگ نہیں ہورہی، وفاق کے رویے کے سبب سندھ حکومت بجلی کے اپنے منصوبوں کی جانب بڑھ رہی ہے ہم جو منصوبے شروع کرنے جارہے ہیں ہمیں اس کے لیے اسلام آباد سے اجازت لینے کی ضرورت نہیں۔
