اسلام آباد: پاکستان پیپلز پارٹی کے چیئرمین بلاول بھٹو نے قومی مفادات کے لیے حکومت کی غیر مشروط حمایت کا اعلان کردیا، ان کا کہنا تھا کہ تعمیری تنقید کرتا رہوں گا تاہم پاکستان کی حمایت کرنا اولین مقصد ہے۔
تفصیلات کے مطابق پاکستان پیپلز پارٹی کے چیئرمین بلاول بھٹو نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ دنیا سے تعلقات بہتر کرنے کی حکومتی کوشش کو سراہنا چاہیئے۔
بلاول بھٹو کا کہنا تھا کہ دنیا سے تعلقات بڑھانے کی حکومت کی کوشش کی حمایت کرتا ہوں، ضرورت پڑنے پر تعمیری تنقید کرتا رہوں گا تاہم پاکستان کی حمایت کرنا اولین مقصد ہوگا۔
Having said that in the greater national interest everyone should support Pakistan’s efforts to engage the world. I therefor unconditionally support governments efforts. Will always provide constructive criticism when needed but will always support 🇵🇰 first. 2/2 #TrumpHostsKhan
— BilawalBhuttoZardari (@BBhuttoZardari) July 23, 2019
واضح رہے کہ وزیر اعظم عمران خان دورہ امریکا پر ہیں جہاں گزشتہ روز انہوں نے امریکی صدر ڈونلڈ ٹرمپ سے ملاقات کی۔
پاکستان کی جانب سے ملاقات کے جاری کردہ اعلامیے کے مطابق وزیر اعظم نے امریکی کارپوریٹ سیکٹر کو پاکستان میں سرمایہ کاری کی دعوت دی اور امریکی صدر کو پاکستان کے سماجی و اقتصادی ترقی پر نقطہ نظر سے آگاہ کیا۔
اعلامیے میں کہا گیا کہ امریکی صدر نے جنوبی ایشیا میں امن پر وزیر اعظم کے نقطہ نظر کی تعریف کی۔ صدر ٹرمپ نے مسئلہ کشمیر کے حل میں ثالثی کا کردار ادا کرنے کی بھی پیشکش کی اور مذاکرات کے بعد امریکی صدر نے وزیر اعظم اور وفد کو وائٹ ہاؤس کا دورہ بھی کروایا۔