کراچی: چیئرمین پاکستان پیپلز پارٹی بلاول بھٹو زرداری نے میئر کراچی بیرسٹر مرتضیٰ وہاب کو اپنا ترجمان مقررکردیا ہے۔
صدر پاکستان آصف علی زرداری کے صاحبزادے اور پی پی چیئرمین بلاول بھٹو نے آئندہ اپنی ترجمانی کے لیے موجودہ میئر کراچی کا انتخاب کیا ہے، مرتضیٰ وہاب اب میئر کا عہدہ رکھنے کے ساتھ ساتھ بلاول کے ترجمان بھی ہونگے۔
پیپلز پارٹی کی جانب سے بیرسٹر مرتضیٰ وہاب کی بطور ترجمان بلاول بھٹو زرداری تقرری کا نوٹیفکیشن بھی جاری کردیا گیا ہے۔
اس سے قبل آئینی ترامیم کے معاملے پر گزشتہ دن وزیراعظم شہباز شریف سے چیئرمین پیپلزپارٹی بلاول بھٹو کی اہم ملاقات ہوئی ہے۔
ذرائع کا بتانا تھا کہ وزیراعظم شہباز شریف سے بلاول بھٹو کی ملاقات میں آئینی ترامیم اور موجودہ سیاسی صورت حال پر تبادلہ خیال کیا گیا۔
وزیر اعظم سے ملاقات کے بعد بلاول بھٹو زرداری نے مولانا فضل الرحمان سے ان کی رہائش گاہ پر ملاقات کی تھی، فضل الرحمان نے وفد کے ساتھ بلاول بھٹو کا استقبال کیا تھا۔