کراچی: پاکستان پیپلز پارٹی کے چیئرمین بلاول بھٹو زرداری کا کہنا ہے کہ اطلاع ملی ہے میاں صاحب کچھ گڑ بر کرنے کیلئے انتظامیہ پر دباؤ ڈال رہے ہیں۔
پاکستان پیپلز پارٹی کے چیئرمین بلاول بھٹو زرداری نے وائس آف امریکہ سے گفتگو میں کہا کہ میاں صاحب انتظامیہ پر دباؤ ڈال رہے ہیں اور میں خبر دار کررہاں ہوں کہ ایسا کچھ ہونا نہیں چاہیے۔
بلاول بھٹو نے کہا کہ امید ہے نگراں حکومت اور انتظامیہ اس طرح کا کوئی قدم نہیں اٹھائے گی، میں تو سیاسی استحکام اور ملک کو آگے لے کر جانا چاہتا ہوں۔
انہوں نے کہا کہ راجاریاض ن لیگ کے ٹکٹ پر انتخاب لڑ رہے ہیں، اس لیے نگراں سیٹ اپ پر شک و شبہات ہیں، امید ہے کہ ن لیگ کی کوشش ناکام رہے گی۔
بلاول بھٹو نے کہا کہ جتنا ممکن ہو شفاف انتخابات کرائیں اور لیول پلیئنگ فیلڈ فراہم کی جائے، میرے لیے بہت مشکل ہے کہ ن لیگ کے ساتھ اتحاد میں جاؤں، یہ ووٹ کو عزت دلانے والی مسلم لیگ نہیں۔
بلاول بھٹو کا کہنا تھا کہ یہ آئی جے آئی اور امیر المومنین بننے کا خواب دیکھنے والی مسلم لیگ ہے، ن لیگ کے ساتھ ہمارا چلنا مشکل ہے۔
بلاول بھٹو نے کہا کہ نوازشریف ون، ٹو اور تھری کا ایک جمہوری انداز تھا جو اب ختم ہوچکا، جو میاں صاحب ہمارے سامنے ہیں وہ ایک مختلف میاں صاحب ہیں۔
