کراچی: پاکستان پیپلز پارٹی کے چیئرمین بلاول بھٹو زرداری نے کہا ہے کہ کراچی کو خون میں نہلانے والے ٹکڑوں میں بٹ گئے، شہریوں سے وعدہ کیا تھا کہ شہر میں امن لائیں گے۔
یہ بات انہوں نے یپلز پارٹی کراچی کے رہنماؤں سے ملاقات کرتے ہوئے کہی۔ ملاقات کرنے والوں میں سعید غنی،نادیہ گبول اور دیگر شامل تھے۔
بلاول بھٹو نے رہنماؤں سے سیاسی صورتحال،تنظیمی امور اور ترقیاتی منصوبوں پر تبادلہ خیال کیا اور کہا کہ کراچی کو خون میں نہلانے والے ٹکڑوں میں بٹ گئے، بےگناہ شہریوں کا خون رائیگاں نہیں جائےگا ہم نے شہریوں سے وعدہ کیا تھا کہ کراچی میں امن لائیں گے ۔
ان کا کہنا تھا کہ شہر قائد کو ترقی دلانے کے لیے 10 ارب روپے کا خصوصی پیکج دیا،مانتا ہوں کراچی میں ترقیاتی کاموں کے سبب عوام کو پریشانی کا سامنا ہے۔
بلاول نے کہا کہ ماضی میں آمروں کے دور میں کراچی کو تباہ کیا گیا، پیپلز پارٹی آئندہ انتخابات میں تاریخ بدل دے گی،کراچی میں اب گولی کی حکمرانی نہیں چلے گی بلکہ جیالے راج کریں گے۔