کراچی: پیپلزپارٹی کے چیئرمین بلاول بھٹو زرداری نے حکومت سندھ کو ہدایت کی ہے کہ پریس کلب لاڑکانہ کے صدر بابو اقبال کے گھر ڈکیتی کے ملزمان کا جلد سراغ لگایا جائے.
تفصیلات کے مطابق بلاول بھٹو زرداری نے اپنے بیان میں لاڑکانہ پریس کلب کے صدر بابو اقبال سے ہمدردی کا اظہار کیا ہے اور ان کی جلد صحتیابی کی دعا کی ہے.
پیپلزپارٹی کے چیئرمین نے حکومت سندھ کوہدایت کی ہے کہ زخمی صحافی بابو اقبال کے بہتر علاج کو یقینی بنایا جائے اور اس واقعے میں ملوث ملزمان کا سراغ لگا کر ان کو قانون کے کٹہڑے میں لایا جائے۔
یاد رہے چار مسلح افراد لاڑکانہ پریس کلب کے صدر بابو اقبال کی کراچی گلشن اقبال میں رہائش گاہ میں گھس گئے تھےاور اہل خانہ کو یرغمال بنا کرگھر سے نقد رقم، زیورات اور دیگر قیمتی سامان لیکر فرار ہوگئے تھے.
گھر میں موجود بابو اقبال اور ان کے بھائی نے مزاحمت کی کوشش کی جس پرملزمان نے فائرنگ کرکے انہیں زخمی کردیا تھا.
فارنسک ٹیم نے ڈکیتی کے بعد جائے وقوعہ پر پہنچ کر شواہد جمع کر لیےتھے، پولیس نے تحقیقات شروع کردی لیکن کوئی مشتبہ شخص ابھی تک گرفتار نہیں کیا جاسکا.
یاد رہے وزیراعلی سندھ سید قائم علی شاہ کی جانب سے واقعے کا نوٹس لے لیا گیا تھا، وزیراعلی نے آئی جی سندھ کو واقعہ کی رپورٹ پیش کرنے کی ہدایت کی تھی.
