اسلام آباد : چیئرمین پی پی پی بلاول بھٹو نے والدہ شہید بے نظیر بھٹو کو یوم پیدائش پر خراج عقیدت پیش کیا اور کہا بینظیر بھٹو کی قیادت وژن،اقدار ،ترقی کا مجسم نمونہ تھی۔
تفصیلات کے مطابق پیپلز پارٹی کی شہید چیئرپرسن اور سابق وزیراعظم بے نظیر بھٹو کا اکہترواں یوم پیدائش آج ہے۔
چیئرمین پی پی بلاول بھٹو نے شہیدبینظیر بھٹوکو یوم پیدائش پر خراج عقیدت پیش کرتے ہوئے کہا کہ شہید بینظیر بھٹو کی قیادت وژن،اقدار ،ترقی کا مجسم نمونہ تھی، ان کا یوم پیدائش کے باعث21جون قوم کیلئے اہمیت کاحامل ہے۔
بلاول بھٹو کا کہنا تھا کہ شہید بینظیر بھٹو امید،بہادری اور حوصلے کی کرن تھیں، انھوں نے پاکستان کو سائنسی، معاشی اور صنعتی شعبوں میں آگےبڑھایا۔
انھوں نے مزید کہا کہ بی بی شہیدنے رواداری کےفروغ، شہری آزادیوں کے تحفظ ،جمہوریت کیلئے انتھک جدوجہدکی، وہ سب کے لیے مساوی مواقع پر یقین رکھتی تھیں۔
چیئرمین پی پی نے بتایا کہ جھوٹے مقدمات ،قید تنہائی کے باوجود بی بی شہید آخری سانس تک ظلم کیخلاف لڑتی رہیں، انھوں نے ہمیں معاف کرنے کی طاقت سےبھی روشناس کرایا اور سکھایا حقیقی قیادت ذاتی بغض و عناد سے بالاتر ہوتی ہے۔
ان کا مزید کہنا تھا کہ شہید بینظیر بھٹو کا جذبہ زندہ اور تعلیمات قائم ہیں، آج ہم آپ کی اقدار سے اپنی اٹل وابستگی کا تجدید عہد کرتے ہیں، دعا ہے ہم آپ کی جرات اور غیر متزلزل لگن سے ہمیشہ حوصلہ حاصل کرتے رہیں۔
