کراچی: سانحہ کارساز کے شہداء کی آٹھویں برسی پر پیپلزپارٹی کے چیئرمین بلاول بھٹو زرداری نے کراچی میں یادگار شہداء پر حاضری دی۔
آج سے آٹھ سال قبل 18 اکتوبر 2007 کو سابق وزیراعظم اور پیپلزپارٹی کی چیئرپرسن بینظیربھٹو کئی سال بعد وطن واپس لوٹیں تو عوام کا جم غفیر انکے استقبال کے لئے موجود تھا۔ انکا قافلہ جناح انٹرنیشنل ایئرپورٹ کراچی سے مزارِ قائد کی جانب بڑھ رہاتھا کہ دو ہولناک دھماکے ہوئے جس میں 150 سے زائد افراد جاں بحق جبکہ سینکڑوں زخمی ہوئے تھے۔
پیپلزپارٹی کے چیئرمین بلاول بھٹو زرداری، آصفہ بھٹوزرداری اور بختاور بھٹو زرداری نے اس واقعے کی یاد میں تعمیرکردہ یادگار شہداء پر پھول چڑھائے اور فاتحہ خوانی کی۔
پیپلز پارٹی کے چیئرمین کی آمد کے موقع پرکارساز پرواقع یادگارشہداء پرسیکیورٹی کے سخت انتظامات کئے گئے تھے۔
اس موقع پروزیراعلیٰ سندھ سید قائم علی شاہ ،اسپیکر سندھ اسمبلی آغا سراج درانی،ڈپٹی اسپیکر سندھ اسمبلی شہلا رضا صوبائی وزیر تعلیم و اطلاعات نثار کھوڑو سمیت دیگر رہنمااور کارکنان بھی موجود تھے۔
