مزاحیہ ٹی وی پروگرام دی کازبی (Bill cosby) شو جن دنوں شہرت کی بلندیوں پر تھا، اُس دوران بل کازبی کا شمار امریکہ میں سب زیادہ زیادہ معاوضہ لینے والے فن کاروں میں ہوتا تھا۔ وہ اب 87 سال کے ہیں۔ 2014ء میں دنیا بھر میں مشہور اس امریکی کامیڈین پر ایک ساٹھ سال سے زائد عمر کی خاتون نے الزام عائد کرتے ہوئے کہا تھا کہ بل کازبی نے اسے نوجوانی میں جنسی زیادتی کا نشانہ بنایا تھا۔ اس کے بعد ایک درجن سے زائد خواتین اسی نوعیت کے مختلف الزامات کے ساتھ سامنے آئیں اور کامیڈین کو عدالتی کٹہرے میں لاکھڑا کیا۔ لیکن معروف اسکالر اور ادیب مولانا وحید الدین خاں کی یہ تحریر اس وقت کی ہے جب بل کازبی کی شہرت داغ دار نہیں ہوئی تھی۔
مولانا اپنی ایک تحریر میں بل کازبی کے بارے میں لکھتے ہیں: بل کازبی (Bill cosby) ایک سیاہ فام امریکی ہے۔ وہ 1937ء میں ایک غریب خاندان میں پیدا ہوا۔ ابتدا وہ بہ مشکل ایک ہزار ڈالر سالانہ کماتا تھا۔ آج اس کی سالانہ آمدنی کئی ملین ڈالر تک پہنچ چکی ہے۔ سفید فام امریکا میں ایک سیاہ فام شخص کو یہ غیر معمولی کام یابی کیوں حاصل ہوئی؟
جواب یہ ہے کہ تعلیم اور دانش مندانہ جدوجہد کے ذریعے۔ بل کازبی فلاڈالفیا کے ایک اسکول میں پانچویں گریڈ میں تھا۔ وہ اسکولوں میں اکثر تماشے کیا کرتا تھا اور پڑھائی پر زیادہ توجہ نہیں دیتا تھا۔ اس کی خاتون ٹیچر نیجل (Nagle) نے ایک روز اس سے کہا کہ اگر تم جو کرنا چاہتے، ہو تب بھی تمہیں اعلیٰ تعلیم حاصل کرنا چاہیے۔ تعلیم کے بغیر تم کسی بھی میدان میں ترقی نہیں کر سکتے۔
بل کازبی نے اس نصحیت کو پکڑ لیا۔ اس نے پڑھنے میں محنت شروع کر دی۔ یہاں تک کہ اس نے ایجوکیشن میں ڈاکٹریٹ کر لیا۔ اس کے بعد اس نے تفریحی پروگراموں میں حصہ لینا شروع کیا۔ آخر کار اس کو ٹیلی ویژن پروگرام ملنے لگے۔ آج وہ امریکا کا مشہور ترین کامیڈین ہے۔ بل کازبی شو امریکی ٹی وی کا سب سے منہگا پروگرام ہوتا ہے۔ دوسرے بہت سے سیاہ فام امریکیوں کے برعکس، اس نے نسلی امتیاز کی باتیں کرنے سے پرہیز کیا۔ اس نے اپنی کہانیاں عالمی واقعات کی بنیاد پر بنائیں، جو تمام لوگوں کے لیے قابل فہم ہو سکیں۔
امریکی عام طور پر سیاہ فام لوگوں کو پسند نہیں کرتے تھے، مگر وہ بل کازبی کے پروگرام کو نہات شوق کے ساتھ دیکھتے ہیں۔ بل کازبی نے سفید فام لوگوں کی رعایت کی تو سفید فام لوگوں نے بھی بل کازبی کی رعایت کرنا شروع کر دیا۔
اگر آپ چاہتے ہیں کہ دوسرے آپ میں دل چسپی لیں، تو آپ بھی دوسروں میں دل چسپی لینا شروع کر دیجیے اور اس کے بعد آپ کو کسی سے شکایت نہ ہوگی۔
