بل گیٹس نے بھارت کو ایک لیبارٹری قرار دیدیا جہاں پر چیزوں پر تجربات کیے جاتے ہیں، مائیکرو سافٹ کے بانی کی کلپ وائرل ہوگئی۔
بل گیٹس نے میزبان ریڈ ہوفمین کے پوڈ کاسٹ میں شرکت کی جہاں ان سے بھارت کے متعلق بھی سوال کیا گیا، ٹیک کمپنی کے مالک نے برملا کہا کہ ’چیزوں کو آزمانے کے لیے بھارت ایک قسم کی تجربہ گاہ کی حیثیت رکھتا ہے‘، تاہم یہ بات بھارتیوں کو پسند نہیں آئی۔
انٹرویو کے دوران بل گیٹس نے اپنے خیالات کا اظہار کرتے ہوئے کہا کہ بھارت کی مثال ایک ایسے ملک کے طور پر دی جاسکتی ہے جہاں بہت ساری چیزیں مشکل ہیں، جیسے اب بھارت میں صحت، غذا اور تعلیم میں بہتری آرہی ہے
بھارت میں ان شعبوں میں کافی استحکام آرہا ہے اور حکومت اپنی خود کی آمدنی بڑھارہی ہے، 20 سال پہلے کے مقابلے میں لوگوں کی زندگی میں کافی بہتری آئی ہے اور یہ ملک ایک تجربہ گاہ کی طرح ہے کہ کئی چیزوں کو آزمائیں
بل گیٹس نے پوڈ کاسٹ میں کہا کہ ان چیزوں کو آزمانے کے بعد جب آپ ان کی افادیت بھارت میں ثابت کر دیں، تو آپ انھیں دوسری جگہوں پر بھی استعمال کرسکتے ہیں۔
امریکی بزنس مین نے یہ بھی کہا کہ اور اس لیے ہمارے فاؤنڈیشن کے لیے ہمارا سب سے بڑا غیر امریکی دفتر بھارت میں ہے اور پائلٹ پراجیکٹ کی سب سے زیادہ تعداد جو ہم دنیا میں کہیں بھی کر رہے ہیں وہ بھارت میں شراکت داروں کے ساتھ ہیں۔
ایکس پر بل گیٹس کے بات پر ایک صارف نے ردعمل دیتے ہوئے کہا کہ ’بھارت ایک تجربہ گاہ ہے، اور ہم بھارت بل گیٹس کے لیے گندے جانور ہیں، پتہ نہیں ہم کب جاگیں گے!‘
