دنیا کے امیر ترین لوگوں کی فہرست میں شامل مائیکروسافٹ کمپنی کے بانی بل گیٹس نے پاکستانی نوجوان کو گُم نام ہیرو قرار دے دیا۔
سماجی رابطے اور مائیکربلاگنگ پلیٹ فارم ٹویٹر پر بل گیٹس نے ایک ویڈیو جاری کی جس میں انہوں نے کرونا وبا کے دوران خدمات انجام دینے والے انسان دوست ہیروز کی خدمات کا اعتراف کرتے ہوئے انہیں خراج تحسین پیش کیا۔
بل گیٹس نے بلوچستان کے جنوب مغربی علاقے سے تعلق رکھنے والے پاکستانی نوجوان سکندر بزنجو کو بھی ہیرو قرار دیا اور بتایا کہ سکندر بزنجو نے کرونا وبا اور لاک ڈاؤن کے دوران بلوچستان کے پسماندہ علاقوں میں خوراک تقسیم کیں۔
سکندر بزنجو نے ڈاکٹرز اور طبی عملے میں حفاظتی لباس (پی پی) ای بھی تقسیم کیے۔
بل گیٹس نے کرونا وبا کے دوران انسانیت کی خدمت کرنے والوں میں سے 7 کا انتخاب کیا جس میں امریکا کے معروف کاروباری افراد بھی شامل ہیں۔
Thank you to the heroes everywhere working to keep us safe. I hope their stories inspire you just as much as they have me: https://t.co/DYFUYMEPK7 pic.twitter.com/UKT9BfXHyk
— Bill Gates (@BillGates) September 12, 2020
اپنی ویب سائٹ پر شائع ہونے والی رپورٹ میں بل گیٹس نے بتایا کہ ’بلوچستان سے تعلق رکھنے والا نوجوان سکندر بزنجو نے کرونا کے خلاف جنگ لڑی اور اُس نے 10 ہزار سے زائد لوگوں میں راشن تقسیم کیا جبکہ فرنٹ لائن پر لڑنے والے طبی عملے کو فیس ماسک، فیس شیلڈ، سینیٹائزر سمیت دیگر آلات فراہم کیے‘۔
عرب نیوز سے گفتگو کرتے ہوئے سکندر بزنجو کا کہنا تھا کہ ’یہ میری یا میری ٹیم کی کامیابی نہیں، مجھے یہ دیکھ کر خوشی ہورہی ہے کہ عالمی سطح پر بلوچستان کا نام روشن ہوا، اس بات پر مجھے فخر بھی ہے‘۔
اُن کا کہنا تھا کہ ’دنیا کا ہر شخص بل گیٹس کو جانتا ہے، میرے گاؤں اور دیگر اضلاع کے لوگ بھی اس بات پر بہت خوش ہوئے کہ بل گیٹس نے ہماری خدمات کا اعتراف کیا‘۔
بزنجو نے بتایا کہ وہ بلوچستان کے ضلع خضدار میں واقع نال سے تعلق رکھتے اور کراچی میں مقیم ہیں، انہوں نے ڈاکٹر خالد اسماعیل، ڈاکٹر یاسر بلوچ کے ساتھ مل کر ایک ٹیم تشکیل دی تھی جس نے کرونا وبا اور لاک ڈاؤن کے دنوں میں غریب لوگوں کی مدد کی اور طبی عملے کو ہر ممکن حفاظتی اشیاء فراہم کیں۔