ریاض: سعودی عرب میں مقیم غیر ملکی شہریوں کو نومولود بچے کی رجسٹریشن کی سہولت گھر بیٹھے مہیا کردی گئی، برتھ سرٹیفیکیٹ گھر پر پہنچ جائے گا۔
اردو نیوز کے مطابق سعودی عرب میں مقیم غیر ملکیوں کو اب نومولود کی رجسٹریشن کے لیے احوال مدنیہ (سول افیئرز) کے دفتر جانے کی ضرورت نہیں رہی، اب یہ کام ابشر کے ذریعے آن لائن کروایا جا سکتا ہے۔
ابشر ایپ کی جانب سے جاری بیان میں کہا گیا ہے کہ ابشر کے ذریعے مقیم غیر ملکی نومولود کی پیدائش کی رجسٹریشن کروا سکتے ہیں، برتھ سرٹیفیکیٹ نیشنل ایڈریس پر موصول ہو جائے گا۔
ابشر ایپ انتظامیہ نے نومولود کی پیدائش کے اندراج کے طریقہ کار کے حوالے سے بتایا کہ پہلے ابشر پر جائیں اور خدمات کا انتخاب کریں، اس کے بعد الاحوال المدنیہ کے آپشن کا انتخاب کریں، پھر مقیم غیر ملکیوں کے لیے نومولود کے اندراج کی سروس منتخب کریں۔
انتظامیہ نے مزید کہا کہ مطلوبہ معلومات کا آن لائن اندراج کیے جانے کے بعد برتھ سرٹیفیکیٹ مقیم غیر ملکی کے نیشنل ایڈریس پر پہنچ جائے گا، اس کی سہولت مہیا کی گئی ہے۔
