بھارت کی ریاست اتر پردیش سے تعلق رکھنے والا بھارتیہ جنتا پارٹی (بی جے پی) کا رہنما 9 سال قبل نابالغ لڑکی کو جنسی زیادتی کا نشانہ بنانے میں ملوث نکلا۔
میڈیا رپورٹس کے مطابق اتر پردیش کی مقامی عدالت نے بی جے پی رکن اسمبلی رام دلار گوڑ کو نابالغ لڑکی کو جنسی زیادتی کا نشانہ بنانے میں قصور وار ٹھہرا دیا۔
رام دلار گوڑ نے 2014 میں لڑکی کو جنسی زیادتی کا نشانہ بنایا تھا۔ متاثرہ لڑکی کے اہل خانہ نے بی جے پی رہنما کے خلاف مقدمہ درج کروایا تھا۔
ایڈیشنل سیشن جج احسان اللہ نے دوران سماعت ملزم کو قصور وار قرار دیتے ہوئے جیل بھیجنے کا حکم جاری کیا۔
سرکاری وکیل وکاس شاکیا کے مطابق رام دلار گوڑ 2022 میں اتر پردیش اسمبلی کے رکن منتخب ہوئے تھے، ملزم کو کیس میں قصور وار ٹھہرایا گیا جبکہ 15 دسمبر کو ملزم کو سزا سنائی جائے گی۔
متاثرہ لڑکی کے اہل خانہ سماعت کے دوران کمرہ عدالت میں موجود تھے جنہوں نے عدالتی کارروائی پر اطمینان کا اظہار کیا۔ انہوں نے کہا کہ ہمیں امید ہے ملزم کو کم از کم 20 سال قید کی سزا سنائی جائے گی۔
جنسی زیادتی کا نشانہ بننے والی لڑکی کے بھائی نے اپنے بیان میں کہا کہ رام دلار گوڑ نے ہم پر ہر طرح سے دباؤ ڈالنے کی کوشش کی۔
