کالی کشمش ایسا میوہ ہے جو نہ صرف آپ کو غذائیت فراہم کرتی ہے بلکہ بہت سے امراض کیلیے نہایت مفید بھی ہے، یہ قدرت کا انمول تحفہ ہے۔

وٹامنز، معدنیات اور اینٹی آکسیڈنٹس سے مالا مال یہ خشک میوہ خاص طور پر قدرتی شکر، جیسے گلوکوز اور فریکٹوز سے بھرپور ہوتا ہے، جو فوری توانائی فراہم کرتی ہے۔

کالی کشمش میں پوٹاشیم کی بھرپور مقدار اسے صبح سویرے کھانے کو بہترین بناتا ہے جس سے جسم میں سوڈیم کی کافی حد تک کمی ہوتی ہے۔

سوڈیم ہائی بلڈ پریشر کی اہم وجوہات میں سے ایک ہے، اس طرح مٹھی بھر کالی کشمش آپ کے مسئلے کا علاج کر سکتی ہے۔

استعمال کرنے کا طریقہ

ماہرین صحت کے مطابق اگر کالی کشمش کو رات بھر پانی میں بھگو کر رکھا جائے اور صبح نہار منہ استعمال کیا جائے تو اس کے فوائد کئی گنا بڑھ جاتے ہیں۔

آپ کو ہائی بلڈ پریشر کو کنٹرول کرنے میں مدد مل سکتی ہے۔ کشمش کو اگر بھگو کر اس میں دودھ شامل کرکے پئیں گے تو یہ آپ کو ذہنی سکون بھی فراہم کرے گا۔

میڈیا رپورٹ کے مطابق بھیگی ہوئی کالی کشمش کے 6 بڑے فوائد ہیں جس کا ذکر مندرجہ ذیل سطور میں کیا جا رہاہے

نظامِ ہاضمہ :

کالی کشمش میں موجود فائبر ہاضمے کے عمل کو بہتر کرتا ہے، اس سے قبض کی شکایت دور جبکہ اس سے آنتوں میں مفید بیکٹیریا کی افزائش بھی ہوتی ہے۔ اس میں موجود قدرتی شکر نہ صرف فوری توانائی فراہم کرتی ہے بلکہ معدے کی بے چینی میں بھی آرام دیتی ہے۔

ہڈیاں مضبوط :

اس میں کیلشیم کی وافر مقدار ہڈیوں کو مضبوط بنانے میں مدد دیتی ہے۔ اسے روزانہ بھگو کر کھانے سے آسٹیوپوروسس (ہڈیوں کے بھربھرا پن) جیسے امراض سے بچاؤ ممکن ہے، خاص طور پر بڑی عمر کے افراد کے لیے یہ نہایت مفید ہے۔

سوزش میں کمی :

کالی کشمش میں اینٹی آکسیڈنٹس کی بڑی مقدار پائی جاتی ہے، جیسے پولی فینولز، فلیوونوئڈز اور فینولک ایسڈ۔ یہ مرکبات جسم میں موجود مضر فری ریڈیکلز کو بے اثر کرتے ہیں، جس سے آکسیڈیٹیو اسٹریس اور سوزش میں کمی آتی ہے۔

امراض قلب سے بچاؤ :

فلیوونوئڈز جیسے کیورسیٹن اور کیٹیچن دل کے لیے نہایت مفید سمجھے جاتے ہیں۔ یہ خون کی گردش کو بہتر بناتے ہیں، سوزش کم کرتے ہیں، بلڈ پریشر اور کولیسٹرول کو کنٹرول میں رکھتے ہیں، جس سے ہارٹ اٹیک اور فالج کے امکانات کم ہو جاتے ہیں۔ اور امراض قلب اور کینسر کے خطرات بھی کم ہوجاتے ہیں۔

قوت مدافعت کی مضبوطی :

وٹامن سی، بی 6 اور زنک جیسے اہم غذائی اجزا پر مشتمل کالی کشمش مدافعتی نظام کو مضبوط بناتی ہے۔ اور جسم موسمی اثرات سے لڑنے کے قابل ہو جاتا ہے۔

خون میں آئرن کی کمی : 

کالی کشمش آئرن حاصل کرنے کا بہترین ذریعہ ہے جو خون میں سرخ خلیات بنانے اور جسم کے مختلف حصوں تک آکسیجن پہنچانے میں بنیادی کردار ادا کرتا ہے۔ آئرن کی کمی سے پیدا ہونے والی کمزوری، تھکن اور خون کی کمی (انیمیا) میں بھی بھیگا ہوا کشمش فائدہ مند ہے۔