لاہور: پاکستان کرکٹ ٹیم کے مڈل آرڈر بیٹسمین نے عمر اکمل نے پی سی بی کے شوکاز نوٹس کا جواب جمع کرادیا۔ ان کا کہنا ہے کہ جو کچھ ہوا تھا وہ جواب میں لکھ دیا ہے امید ہے پی سی بی بہتر فیصلہ کرے گا۔
تفصیلات کے مطابق قومی کرکٹ ٹیم کے کوچ مکی آرتھر پر گالیاں دینے کے الزام پر عمر اکمل نے پی سی بی کے شوکاز نوٹس کا جواب جمع کرادیا ہے۔
عمراکمل کا اس حوالے سے کہنا ہے کہ جو کچھ بھی ہوا وہ سب لکھ دیا ہے، مکی آرتھر کو بہت برداشت کیا لیکن اب یہ میری برداشت سے باہر ہو گیا تھا۔ مسلسل زیادتیاں ہوتی رہیں اس لئے میڈیا پر آنا پڑا۔
انہوں نے کہا کہ چیئرمین پی سی بی نجم سیٹھی سے انصاف کی امید ہے، بورڈ جو بھی فیصلہ کرے گا اسے من وعن قبول کروں گا۔
مزید پڑھیں: مکی آرتھر نے مجھے گالیاں دیں، عمر اکمل
واضح رہے کہ قومی ٹیم کے مڈل آرڈر بیٹسمین عمراکمل نے ہیڈ کوچ مکی آرتھر پر غلط زبان استعمال کرنے کا الزام عائد کیا تھا جس پر پی سی بی نے ایک ہفتہ قبل عمر اکمل کو شوکاز نوٹس جاری کیا تھا۔
