کوئٹہ: سریاب روڈ پردھماکے میں 11 افراد جاں بحق ہوگئے جبکہ دو بچوں سمیت 22 افراد زخمی ہوگئے ہیں۔
تفصیلات کے مطابق آج بروز پیر سریاب روڈ کے علاقے دکانی بابا چوک پرایک بس میں دھماکہ ہوا ہے جس میں 11 افراد جاں بحق جبکہ 22 زخمی ہوئے ہیں جن میں سے تین کی حالت تشویش ناک بتائی جارہی ہے۔
پولیس، ایف سی اور ریسکیوٹیمیں جائے وقوعہ پر پہنچ گئی ہیں اورمیتوں اور زخمیوں کو نزدیکی اسپتال منتقل کیا جارہاہے۔
ریسکیو ذرائع کے مطابق سول اسپتال کوئٹہ میں منتقل کئے گئے زخمیوں کی تعداد 17 ہے جبکہ جائے واقعہ کے نزدیک واقعہ تین نجی اسپتالوں میں بھی زخمیوں کو لے جایا گیا ہے۔
دھماکے کے آواز دور دور تک سنی گئی جبکہ نزدیکی دکانوں کو بھی نقصان پہنچا ہے۔
ذرائع کا کہنا ہے کہ دھماکے کا نشانہ بننے والی بس کراچی سے کوئٹہ آئی تھی اوراس میں چالیس سے زائد افراد سوار تھے۔
بلوچستان کے وزیرداخلہ سرفرازبگٹی کا کہنا تھا کہ وہ اس حملے کی شدید مذمت کرتے ہیں اور دہشت گردی کے خلاف جنگ جاری رکھیں گے۔
انہوں نے مزید کہا کہ محرم الحرام کے سبب کوئٹہ شہرمیں سیکیورٹی کے سخت ترین انتظامات کئے گئے ہیں اسی لئے دہشت گردوں نے پبلک بس کو اپنا نشانہ بنایا ہے۔
0
20
