لاہور: پنجاب کے دارالحکومت میں معصوم بچے کے اندھے قتل اور ڈکیتی کا معمہ حل کرلیا گیا۔
اے آر وائی نیوز کی رپورٹ کے مطابق لاہور ایس پی ماڈل ٹاؤن انویسٹی گیشن اسد مظفر کی سربراہی میں لیاقت آباد پولیس نے کارروائی کرتے ہوئے دو ہفتے قبل 14 سالہ معصوم بچے کے اندھے قتل و ڈکیتی کی واردات کا معمہ حل کرلیا، مدعی مقدمہ سگا خالو ہی قاتل نکلا۔
ایس پی ماڈل ٹاؤن کے مطابق بچے نبیل کے قتل کی واردات میں ملوث تین ملزمان سگا خالو عبدالقیوم اور قریبی رشتے دار طبیب اور سلمان کو گرفتار کرلیا گیا۔
ملزم عبدالقیوم نے 2 مرلے کا گھر ہتھیانے کے لیے اپنی سالی کے بیٹے نبیل کو قتل کرنے کا منصوبہ بنایا، ملزم عبدالقیوم نے لالچ دے کر اپنے دو قریبی رشتے دار ساتھیوں طیب اور سلمان کو بھی ساتھ ملا لیا۔
مقتول نبیل کا والد مالی اور والدہ گھروں میں کام کرتی ہے اور بچے دن بھر گھر میں اکیلے ہوتے تھے، ملزمان طوطے خریدنے کے بہانے مقتول نبیل کے گھر آئے اور اس کی 8 سالہ بہن نور فاطمہ کو چیز لینے باہر بھیج دیا۔
ملزمان نے بچے کو چھریوں کے وار کرکے قتل کیا اور اسے ڈکیتی کا رنگ دینے کے لیے گھر میں لوٹ مار کرکے فرار ہوگئے۔
بعدازاں عبدالقیوم چالاکی سے خود ہی مقدمہ کا مدعی بن گیا اور پولیس سے قاتلوں کی فوری گرفتاری کا مطالبہ کرتا رہا، ملزمان کی نشاندہی پر آلہ قتل چھری، پسٹل اور مسروقہ 2 لاکھ روپے نقدی، چیک بک، پاسپورٹ، شناختی کارڈ و پیج کس برآمد کرلیے گئے۔
ایس پی ماڈل ٹاؤن کے مطابق انویسٹی گیشن لیاقت آباد نے ملزمان کو پیشہ ورانہ مہارت اور جدید ٹیکنالوجی کی مدد سے گرفتار کیا۔
