واشنگٹن: اسرائیل کو ہتھیار فراہم کرنے پر امریکی وزیر خارجہ انٹونی بلنکن وضاحتیں کرنے لگے ہیں، انھوں نے کہا کہ اسرائیل کو حماس سے خطرہ ہے اس لیے اسرائیل کو اپنے دفاع کے لیے ہتھیار فراہم کر رہے ہیں۔
تفصیلات کے مطابق امریکی وزیر خارجہ انٹونی بلنکن نے کہا ہے کہ حماس ہتھیار ڈال دے تو یہ جنگ کل ہی ختم ہو سکتی ہے، امریکا اس جنگ میں شہریوں کے تحفط کو یقینی بنانے کے لیے سب کچھ کر سکتا ہے، غزہ میں انسانی بحران سے متعلق آگاہ ہیں اور امداد کی فراہمی کے لیے ہر ممکن اقدام کر رہے ہیں۔
سی این این کے ایک پروگرام میں گفتگو کرتے ہوئے انٹونی بلنکن نے اتوار کو اسرائیل پر زور دیا کہ وہ حماس کے ساتھ جنگ میں فلسطینی شہریوں کے تحفظ کے لیے مزید اقدامات کرے۔
روس نے غزہ میں عالمی مبصرین بھیجنے کا مطالبہ کر دیا
دو دن قبل ہی انسانی بنیادوں پر فوری جنگ بندی کے لیے اقوام متحدہ کے مجوزہ مطالبے کو امریکا نے ویٹو کیا ہے، اور اب بلنکن نے کہا ہے کہ اسرائیل کو غزہ کے شہریوں کے تحفظ کے لیے ’ایک پریمیم‘ لگانے کی ضرورت ہے اور اس بات کو یقینی بنانا چاہیے کہ انسانی امداد ان لوگوں تک پہنچ سکے جنھیں اس کی ضرورت ہے۔
